З 1 чэрвеня больш за 30 краінаў маюць намер спыніць працу з Беларуссю ў «Зялёных картах»
- 9.01.2023, 19:28
Як быць кіроўцам.
З 1 чэрвеня гэтага года, як паведамлялася раней, больш за 30 краінаў спыняюць працу з Беларуссю ў «Зялёных картах». У Беларускім бюро транспартнага страхавання расказалі, ці не скасавалі ўвядзенне гэтага абмежавання супраць нашай краіны, а таксама далі рэкамендацыі, як быць беларусам пры выездзе за мяжу.
У Беларускім бюро транспартнага страхавання пацвердзілі чытачцы «Люстэрка» (запіс размовы ёсць у распараджэнні рэдакцыі), што намеры Еўропы пра разрыў супрацоўніцтва з нашай краінай у «Зялёнай карце» застаюцца ў сіле. Але пакуль заключаць гэтыя віды страхавых дамоваў можна.
– Нашы страхавыя кампаніі цяпер заключаюць такія дамовы на тэрмін да 31 траўня 2023 года. Пасля гэтага зрабіць будзе нельга. Але гэта на стан сёння, што можа памяняцца за ўвесь гэты час, ніхто не ведае, – растлумачылі ў бюро.
Паводле словаў супрацоўніка, цяпер у «Зялёных картах» выплаты (калі яны неабходныя) на беларускі транспарт на тэрыторыях замежных дзяржаваў робяцца.
– Потым (пасля 31 траўня. – Заўвага. рэд.) пры выездзе за мяжу трэба будзе набываць унутраную страхоўку краіны, якую вы будзеце наведваць. Напрыклад, калі вы едзеце ў Чэхію праз Польшчу, то трэба будзе набываць польскую страхоўку, а потым – чэшскую.
Што такое «Зялёная карта» і што з ёй адбылося
Міжнародная страхоўка «Зялёная карта» працуе ў 47 краінах, сярод іх – Беларусь, большасць краінаў Еўропы, Іран, Туніс і Марока. Такая страхоўка дазваляе кіроўцу не заключаць дамову памежнага страхавання пры перасячэнні межаў (раней так і было). Кіроўцам з Беларусі, якія едуць на сваім аўто за мяжу, трэба набыць «Зялёную карту» – гэта абавязковая дамова, без яе машыны разгорнуць на памежных пераходах. Затое калі за мяжой кіроўца аўто справакуе ДТЗ, то ўсе страты (акрамя штрафаў) і кампенсацыі пацярпелым выплачвае страхоўшчык. Гэта значыць, страхуецца не аўтамабіль, а адказнасць ягонага ўладальніка перад іншымі ўдзельнікамі дарожнага руху.
Праз вайну ва Украіне, а таксама праз санкцыі заходніх краінаў супрацоўніцтва ў сістэме «Зялёная карта» з Беларуссю (як і з Расеяй) некаторыя краіны спынілі. Спачатку ў канцы сакавіка такую пастанову прыняла Украіна. Пазней да Кіева далучыліся яшчэ блізу 30 краінаў, але з агаворкай, што супрацоўніцтва спыніцца з 1 чэрвеня 2023 года. Сярод гэтых краінаў – Аўстрыя, Бельгія, Балгарыя, Вялікая Брытанія, Вугоршчына, Нямеччына, Грэцыя, Данія, Ірландыя, Ісландыя, Гішпанія, Італія, Кіпр, Латвія, Літва, Люксембург, Мальта, Нідэрланды, Нарвегія, Польшча, Партугалія, Румынія, Славакія, Славенія, Фінляндыя, Францыя, Харватыя, Чэхія, Швэцыя, Швэйцарыя, Эстонія.