У бюджэтнікаў прадаўжаюць падаць заробкі

• 29.09.2023, 20:25

На колькі збяднелі лекары і настаўнікі.

У бюджэтнікаў прадаўжаюць падаць рэальныя заробкі, якія разлічваюць з папраўкай на інфляцыю. Гэта вынікае з звестак Белстата. Прычым у настаўнікаў і медыкаў за жнівень знізіліся не толькі рэальныя, але і сярэднія намінальныя заробкі.

Сярэдні заробак бюджэтнікаў у жніўні склаў 1 445,3 рубля. Гэта на 63,7 рубля, ці на 4,2% менш, чым у ліпені. Нагадаем, за ліпень гэты паказнік упаў на 60,2 рубля.

Так, у настаўнікаў сярэдні заробак за жнівень упаў на 56,6 рубля да ліпеня – да 1 485,2 рубля, а ў лекараў ён знізіўся на 130,3 рубля – да 2 885,7 рубля.

Што да рэальных заробкаў, то ў цэлым у бюджэтнікаў яны ўпалі ў жніўні на 3,9% да ліпеня. У цэлым у адукацыі зніжэнне было на ўзроўні на 4,7%, а ў ахове здароўя – на 2,9%. Канкрэтна ў настаўнікаў гэты паказнік знізіўся на 3,4%, а ў лекараў – на 4%.

Нагадаем, у верасні бюджэтнікам павысілі некаторыя выплаты.

Тым часам у Мінэканомікі паведамляюць, што «галоўны вынік эканомікі – істотны рост прыбыткаў насельніцтва». Пра гэта 29 верасня заявіў першы намеснік міністра эканомікі Юры Чабатар. Ён прывёў у прыклад рост сярэдняга заробку. Аднак не стаў гаварыць пра падзенне рэальных заробкаў.