Прэзідэнцкія выбары ў Румыніі: экзітполы аддаюць перамогу мэру Бухарэста

• 18.05.2025, 21:40

Зафіксаваны рэкордны прыход.

У Румыніі закончылася галасаванне ў другім туры прэзідэнцкіх выбараў. Паводле першых экзітполаў, у лідарах ліберальны мэр Бухарэста Нікушор Дан, паведамляе BBC.

Са звестак сацыялагічнага інстытута Avangarde, Дан апярэджвае свайго апанента -нацыяналіста і лідара ультраправай партыі AUR Джорджа Сіміёна — амаль на дзесяць працэнтных пунктаў. Дан набірае 54,9%, Сіміён — 45,1%.

Цэнтральнае выбарчае бюро паведамляе, што прыход склаў 64,72 % - гэта рэкордны паказчык за апошнія дваццаць гадоў.

У сваім першым звароце да прыхільнікаў пасля публікацыі экзітполаў Дан назваў прыярытэтамі для краіны судовую і адміністрацыйную рэформу.

Гэта ўжо другая спроба абрання прэзідэнта Румыніі. Канстытуцыйны суд у снежні 2024 года ануляваў вынікі першага тура, у якім у лідары нечакана выбіўся ультранацыяналіст Кэлін Джарджэску. Улады Румыніі тады заявілі, што маюць звесткі аб расейскім умяшанні ў перадвыбарчую кампанію. Джарджэску не дапусцілі да паўторных выбараў.