Politico: ЕЗ значна скароціць дыпмісію ў Беларусі
- 20.05.2025, 11:24
Да мінімальнага складу.
Еўрапейскі Звяз плануе скараціць колькасць супрацоўнікаў у сваіх замежных дыпламатычных місіях, уключаючы прадстаўніцтва ў Беларусі, паведамляе Politico са спасылкай на ўнутраны дакумент і крыніцы ў структурах ЕЗ (пераклад - сайт Charter97.org).
Паводле крыніц, блізу 10 замежных дэлегацый ЕЗ, уключаючы дэлегацыю Беларусі, будуць зрэзаныя да мінімальнага складу — пасол і адзін - два памочнікі, тады як мясцовы персанал — блізу 100 чалавек — будзе звольнены ў два этапы, у 2026 і 2027 гадах. Пры гэтым афіцыйна дэлегацыі закрытыя не будуць, але фактычна гэта будзе азначаць іх “замарозку” — персанал будзе працаваць дыстанцыйна, без паўнавартаснага офіса.
"Гэта будзе азначаць закрыццё, хоць і без фармальнага абвяшчэння", - паведаміў адзін з чыноўнікаў на ўмовах ананімнасці.
Такі крок стаў часткай маштабнай рэарганізацыі Еўрапейскай службы замежнапалітычнай дзейнасці (EEAS), якую прадставіла новая галоўная дыпламатка ЕЗ Кая Калас. Са слоў чыноўнікаў, Еўрапейская камісія ўжо ўхваліла план рэструктурызацыі, які будзе рэалізаваны на працягу двух гадоў.
Чаму Беларусь?
Беларусь апынулася сярод краін, дзе ЕЗ больш не лічыць патрэбным захоўваць “узмоцненую дыпламатычную прысутнасць”, заявілі крыніцы. Блок ссоўвае прыярытэты з развіцця і дапамогі на стратэгічныя інтарэсы, такія як супрацоўніцтва ў абароне, кантроль за выкананнем санкцый супраць Расеі і процідзеяння іх абыходу.
"Мы больш не можам дазволіць сабе раскошу шырокага дыпламатычнага ахопу ўсюды. Цяпер стаўка - на ўплыў і інтарэсы”, — адзначыў еўрапейскі чыноўнік.
Новыя прыярытэты: санкцыі, абарона, “ценявы флот”.
Замест місій у развіцці, ЕЗ плануе ўзмацніць дэлегацыі ў краінах, ад якіх залежыць захаванне санкцый. Гаворка ідзе пра дзяржавы, чые сцягі выкарыстоўваюць судны расейскага “ценявога флоту”.
Сама рэформа EEAS абыдзецца бюджэту ЕЗ на 20 мільёнаў еўраў ў першы год, але, паводле ацэнак, будзе эканоміць да 9 мільёнаў на год.
Аднак, як папярэдзіла адная з крыніц, будучыя перамовы ў шматгадовым бюджэце ЕЗ могуць прывесці да яшчэ больш жорсткім скарачэнняў.
“Апетыт краін-чальцоў да фінансавання брусэльскіх структур невялікі. Грошы цяпер патрэбныя на абарону”, - дадаў ён.
Еўрапейская камісія пакуль не пракаментавала ініцыятыву.