У Польшчы асудзілі беларуса за шпіянаж у інтарэсах КДБ

• 26.05.2025, 20:17

Падрабязнасці.

Люблінскі абласны суд асудзіў 53-гадовага беларуса Мікалая М. да пазбаўлення волі за шпіянаж. Другі абвінавачаны – 59-гадовы паляк – атрымаў штраф за тое, што не апавясціў адпаведныя службы пра злачынства. Прысуд можа быць абскарджаны, паведамляе Polska Agencja Prasowa.

Як піша выданне, судовы разбор у гэтай справе праходзіў у закрытым рэжыме ў сувязі з важнымі дзяржаўнымі інтарэсамі. Прысуд быў абвешчаны 26 траўня суддзёй Мартай Шмех. Суд прызнаў Мікалая М. вінаватым ва ўдзеле ў шпіёнскай дзейнасці ў інтарэсах выведкі Беларусі, накіраванай супраць Польшчы ў 2018–2023 гадах.

Згодна з абвінаваўчай высновай, Мікалай М. праводзіў мерапрыемствы ў выведцы раёна ваеннага аэрадрома ў Бяла-Падляску, збіраў інфармацыю пра ваенныя паветраныя аперацыі на аэрадроме, а таксама інфармацыю пра чыгуначная інфраструктуры і перамяшчэнне ваеннай тэхнікі. Ён таксама збіраў інфармацыю пра аб'екты і транспартныя сродкі, якія знаходзяцца ў распараджэнні Агенцтва ўнутранай бяспекі, размешчаныя і выкарыстоўваюцца ў Бяла-Падлясцы.

«Паводле звестак пракуратуры, беларус таксама высвятляў, якія мерапрыемствы праводзяць польскія спецслужбы для вярбоўкі іншых беларускіх грамадзянаў, у тым ліку арганізоўваў канал сувязі з супрацоўнікамі КДБ Беларусі», – піша медыя.

Суд асудзіў беларуса да двух гадоў і двух месяцаў пазбаўлення волі. Тэрмін папярэдняга зняволення быў залічаны ў тэрмін пакарання, што азначае, што ён зможа пакінуць турму пасля 30 траўня гэтага года.

Другім фігурантам справы стаў 59-гадовы паляк Бернард С., якога абвінавацілі ў дапамозе беларусу. Паводле звестак следства, ён арганізаваў яго знаходжанне ў Польшчы і даў яму кватэру. Люблінскі абласны суд прызначыў яму штраф памерам 7 тысячаў злотых (6150 рублёў).

Падчас следстваў абодва мужчыны прызналі сябе вінаватымі ў прад'яўленых абвінавачаннях. Прысуд можа быць абскарджаны.