Швэцыя вылучыла Украіне больш за $ 500 млн

• 26.05.2025, 21:49

На ўмацаванне абароназдольнасці.

Швэцыя вылучыла Украіне 4,8 млрд швэдскіх кронаў (блізу $ 504 млн) на ўзмацненне абароназдольнасці.

Пра гэта гаворыцца на сайце Мінабароны краіны, піша «Еўрапейская праўда».

Адзначаецца, што 22 траўня ўрад краіны прыняў пастанову даручыць Узброеным сілам Швэцыі зрабіць фінансавыя ўнёскі ў шматбаковыя фонды і ініцыятывы, накіраваныя на ўзмацненне абароназдольнасці Украіны.

Агульны памер ахвяраванняў складае блізу 4,8 млрд швэдскіх кронаў, і гэтая падтрымка з'яўляецца часткай 19-га пакету дапамогі, вылучанага сёлета.

Міжнародная супольнасць стварыла шэраг шматбаковых фондаў і ініцыятываў, накіраваных на набыццё матэрыялаў і абсталявання для ўмацавання абароназдольнасці Украіны. Стакгольм робіць унёскі ў некалькі з іх.

Кіраўнік швэдскага Мінабароны Пол Ёнсан падкрэсліў, што гэтыя сродкі зробяць Узброеныя сілы Украіны і ўкраінскую абаронную прамысловасць «мацнейшай у абароне ад Расеі».

Сярод іншага размова ідзе пра ўнёскі ў некалькі кааліцый магчымасцяў у рамках Кантактнай групы ў пытаннях абароны Украіны ў фармаце «Рамштайн»:

Кааліцыя размінавання: 100 млн кронаў (блізу $10,5 млн). На гэтыя грошы прафінансуюць набыццё абсталявання для размінавання.

Кааліцыя дронаў: 300 млн кронаў (блізу $31,5 млн). Швэцыя дапаможа прафінансаваць набыццё розных тыпаў беспілотнікаў.

Кааліцыя бяспекі на моры: 50 млн кронаў (блізу $5,2 млн). Швэдскі ўнёсак дапаможа фінансаваць навучанне асабовага складу ВМС Украіны ў рамках аперацыі Intercharge.

Кааліцыя сістэмаў бяспекі і кіравання ІТ: 30 млн кронаў (блізу $3,1 млн). Сродкі пойдуць на набыццё абсталявання для стварэння ўкраінскай сістэмы кіравання сістэмай Delta.

Таксама швэдскі ўрад узгадніў далейшы ўнёсак у «дацкую мадэль» набыцця зброі. Цяпер Стакгольм пастанавіў дадаткова вылучыць больш за 1 млрд швэдскіх кронаў (блізу $105 млн).

Акрамя таго, урад пастанавіў вылучыць 418 млн швэдскіх кронаў (блізу $ 43,9 млн) на набыццё абсталявання для бронятэхнікі.

Таксама ўрад пастанавіў падтрымаць дзве шматбаковыя ініцыятывы ў набыцці боепрыпасаў, сярод іх чэшскую. На гэта вылучаць дадатковыя 550 млн швэдскіх кронаў (блізу $57,7 млн).

У дадатак урад вылучае больш за 1 млрд швэдскіх кронаў на набыццё як сістэмаў супрацьпаветранай абароны, так і дальнабойных беспілотнікаў.