Цярпенне ЕЗ да Вугоршчыны «растае з кожным днём»

• 27.05.2025, 17:43

Пра гэта заявіў міністр у пытаннях Еўропы ў МЗС Нямеччыны.

Міністр у пытаннях Еўропы ў МЗС Нямеччыны Гюнтэр Крыгбаўм заявіў, што цярпенне краін-чальцоў Еўрапейскага Звязу да Вугоршчыны змяншаецца праз працяглыя парушэнні вяршэнства права, і ўсё больш дзяржаў разглядаюць далейшыя крокі.

Ягоныя словы цытуе Tagesspiegel, паведамляе “Еўрапейская праўда”.

На палях сустрэчы міністраў ЕЗ у Брусэлі Крыгбаўм заявіў, што цярпенне нямецкіх калегаў “растае з кожным днём”.

Ён адзначыў, што працэдура пазбаўлення Вугоршчыны права голасу зацягнулася на досыць доўгі час", і прыйшоў час задумацца над тым, як дабрацца да сутнасці праблемы.

Крыгбаўм падкрэсліў, што новы федэральны ўрад спачатку будзе спрабаваць правесці прамыя перамовы з урадам прэм'ера Віктара Орбана.

"Але мы таксама павінны сказаць, што ўсялякае трыванне мае межы", - падкрэсліў нямецкі міністр.

Таксама ён падкрэсліў, што гаворка ідзе аб правах грамадзян ЕЗ, якія “гарантаваныя дамовамі".