У мабільных аператараў з'явіліся змены

• 29.05.2025, 17:35

Яны датычацца як фізічных асоб, так і кампаній.

У мабільных аператараў з'явіліся чарговыя змены. Да прыкладу, кампанія А1 з 1 чэрвеня павысіць кошт некаторых паслуг, а ў life:) з'явіўся новы тарыфны план, піша «Люстэрка».

Кампанія A1 абвясціла, што ўводзіць змены ў абслугоўванні ў некаторых тарыфных планах мабільнай і фіксаванай сувязі. Гэта датычыцца як фізічных асоб, так і кампаній. Так, з 1 чэрвеня аператар павялічыць абанплату для некаторых дзеючых і архіўных тарыфных планаў фіксаванай сувязі. Сярод іншага гэта закране лінейкі «Мега» і «Комбі».

«Гэтыя змены дазволяць кампаніі павялічыць прапускную здольнасць знешняга канала, працягнуць інвеставаць у пашырэнне пакрыцця сеткі, а таксама забяспечыць укараненне новых тэхналогій і сэрвісаў для прадастаўлення сучасных паслуг сваім кліентам», – тлумачыць А1.

Таксама з 1 чэрвеня фірма А1 спыніць абслугоўванне абанентаў архіўных тарыфных планаў «Без Ліміта» і «Без Ліміта 2.0». «Да названай даты абаненты дадзенага тарыфнага плана могуць самастойна перайсці на любыя актуальныя прапановы кампаніі, - удакладняе аператар. — Разам з гэтым абаненты, якія не змянілі тарыфны план да ўказанай даты самастойна, будуць аўтаматычна пераведзены на актуальны тарыфны план «Драйв Анлім».

Мабільны аператар life:) з 3 чэрвеня спыніць падлучэнне і падаўжэнне некаторых паслуг. Сярод іншага гэта «Свет анлайн», а таксама парталы gdzuka.alls.by, tomytube.alls.by і іншыя. «Калі вы карыстаецеся гэтымі сэрвісамі, яны будуць дзейнічаць да канца тэрміну дзеяння, пасля чаго адключацца аўтаматычна», – удакладняе фірма.

Таксама life:) запусціў тарыф «Канструктар». «Яго асаблівасць - напаўненне можна сабраць спецыяльна пад свае лічбавыя звычкі. У тарыфе ў змаўчанні няма ўключанага галасавога-і інтэрнэт-трафіку, - паведамляе аператар. - Падлучыць неабходны пакет хвілін, патрэбную колькасць гігабайтаў, актываваць спецыяльныя сэрвісы можна за адзін клік у дадатку «Мой life:)». Абаненцкая плата 4,9 рубля ў месяц».

Кампанія МТС да 13-годдзя сваёй інтэрнэт-крамы запусціла зніжкі на смартфоны, ноўтбукі, планшэты, гульнявыя дэвайсы, смарт-гадзіны, навушнікі, разумныя калонкі, тэлевізары, пыласосы, кавамашыны і іншую тэхніку. Як паведамляецца, яны даходзяць да 2000 рублёў на асобныя пазыцыі. Акцыя будзе дзейнічаць да 3 чэрвеня. «Дэвайсы са зніжкамі таксама прапануюцца ў растэрміноўку або крэдыт ад банкаў-партнёраў», – удакладняе кампанія.