За хулігана плацілі ўсім домам - дзіўны выпадак у Менску

• 10.06.2025, 15:38

Шкоду, прычыненую вандалам, раскінулі па рахунках жыхароў.

У чэрвені 2024 года ў адным з менскіх шматпавярховікаў было разбітае шкло ў пад'ездзе. Вінаватаму трэба было аплаціць Br260 за рамонт, паведамілі ў генпракуратуры Беларусі.

Толькі ўсю суму яму аддаваць не давялося. Кошт аплацілі ўсім пад'ездам.

Выстаўленую кампенсацыю размеркавалі па рахунках жыхароў.

«Падчас наглядных мерапрыемстваў у жыллёвай сферы пракуратура Партызанскага раёна г. Менска выявіла факты незаконнага ўскладання на ўласнікаў кватэр аднаго з дамоў абавязкаў кампенсацыі выдаткаў на выкананне жыллёва-камунальных паслуг», – растлумачылі ў ведамстве.

Але, згодна з ч. 1 арт. 933 Грамадзянскага кодэкса Рэспублікі Беларусь, шкода прычыненая асобе або маёмасці грамадзяніна, а таксама шкода, прычыненая маёмасці юрыдычнай асобы, падлягае кампенсацыі ў поўным аб'ёме асобай, якая прычыніла шкоду».

Пасля таго як пракуратура зрэагавала на несправядлівасць, ад дырэктара эксплуатацыйнага ўчастка запатрабавалі ліквідацыі выяўленых парушэнняў.

Быў арганізаваны пераразлік аплаты за жыллёва-камунальныя паслугі ўласнікам кватэр таго самага жылога дома ў Менску.