Бізнэсмэн і экс-кандыдат у прэзідэнты прапанаваў Маску стварыць сваю партыю

• 10.06.2025, 18:03

Сам Маск запускаў апытанне пра неабходнасць у ЗША трэцяй нацыянальнай партыі.

Амерыканскі прадпрымальнік і экс-кандыдат у прэзідэнты ад дэмакратаў у 2020 годзе Эндру Янг прапанаваў мільярдэру Ілану Маску (маёмасць $401 млрд паводле версіі Forbes) разам стварыць у ЗША новую партыю.

Янг у 2022 годзе стварыў цэнтрысцкую Forward Party (FWD, партыя «Наперад»). Сваю прапанову супрацоўніцтва ён высунуў Маску пасля сваркі апошняга з амерыканскім прэзідэнтам-рэспубліканцам Дональдам Трампам. На фоне непаразумення кіраўнік Tesla і SpaceX высунуў ідэю стварыць новую партыю пад назовам «Амерыка».

У размове з Politico Янг паведаміў, што пакуль не атрымаў адказ ад Маска.

«Ілан не раз ствараў кампаніі сусветнага ўзроўню літаральна з нуля, а цяпер пераважная большасць амерыканцаў прагнуць новага падыходу. Я гатовы растлумачыць Ілану ці каму заўгодна: трэцяя партыя можа дамагчыся поспеху вельмі хутка», – адзначыў Янг.

Ён дадаў, што ў ЗША цяпер хутчэй за ўсё расце палітычны сегмент незалежных выбарнікаў. «Яны адчуваюць, што ні адна партыя іх не прадстаўляе, а двухпартыйная сістэма не дае ім таго, чаго яны хочуць», – указаў Янг.

Янг у 2020-м удзельнічаў у праймерыз Дэмакратычнай партыі, але не змог набраць дастатковай колькасці галасоў для прадаўжэння ўдзелу ў гонцы. Маск выказваў тады сваю падтрымку Янгу, які ўпершыню вылучыўся на выбарчую пасаду. У 2021-м Янг беспаспяхова балатаваўся на пасаду мэра Нью-Ёрка. У тым самым годзе ён пакінуў Дэмакратычную партыю.

Янг нарадзіўся ў 1975 годзе ў сям'і імігрантаў з Тайваня ў штаце Нью-Ёрк. Пачынаў працу ў стартапах, пасля стварыў сваю адукацыйную кампанію Manhattan GMAT, а потым кампанію Venture for America. Яна дапамагае выпускнікам каледжаў развіваць бізнэс і ствараць працоўныя месцы.