У Індыі разбіўся пасажырскі самалёт, які ляцеў у Лондан

• 12.06.2025, 12:51

На борце знаходзілася, як мяркуецца, 290 чалавек.

У Індыі паблізу аэрапорта горада Ахмедабад упаў пасажырскі самалёт авіякампаніі Air India, які выконваў рэйс у Лондан.

Пра гэта паведамляе The Time of India.

Паведамляецца, што аварыя адбылася неўзабаве пасля ўзлёту з міжнароднага аэрапорта імя Сардара Валабхбхая Патэля. Самалёт упаў у раёне Мегхані, выклікаўшы маштабны пажар - над месцам падзення падняўся густы слуп дыму, які быў бачны на некалькі кіламетраў.

The Times Of India піша, што 290 чалавек знаходзіліся на борце самалёта на момант катастрофы. Між тым выданне ANI падае іншыя звесткі: самалёт перавозіў 242 пасажыры.

Са звестак Flightradar24, разбіўся Boeing 787-8 Dreamliner з рэгістрацыйным нумарам VT-ANB. Авіякампанія Air India ўжо пацвердзіла авіякатастрофу і ў сваёй заяве паведаміла, што самалёт накіроўваўся з індыйскага горада Ахмедабад у Міжнародны аэрапорт Лондан - Гатвік.

Да месца аварыі прыбылі пажарныя, медыкі і выратавальныя брыгады. На гэты момант афіцыйнай інфармацыі аб колькасці загінулых або параненых няма. Таксама не паведамляецца аб прычынах катастрофы.