ВПС ЗША апублікавалі першыя фота новай стэлс-ракеты з ядзернай боегалоўкай

• 12.06.2025, 17:28

Распрацоўка застаецца засакрэчанай.

ВПС ЗША прадэманстравалі першую выяву новай крылатай ракеты далёкага дзеяння з ядзернай боегалоўкай - AGM-181A LRSO Long-Range Standoff. Распрацоўка гэтай ракеты з'яўляецца прыярытэтам для Камандавання глабальнага ўдару і закліканая замяніць састарэлую AGM-86B, якая стаіць на ўзбраенні з канца Халоднай вайны, піша The War Zone (пераклад - сайт Charter97.org).

Візуальна LRSO нагадвае высокатэхналагічную AGM-158 JASSM: зваротная V-падобная хваставая частка, трапецападобнае сячэнне корпуса і клінаваты нос. Візуалізацыя не паказвае паветразаборнік - магчыма, з меркаванняў сакрэтнасці. Некаторыя элементы, магчыма, наўмысна схаваныя ці скажоныя.

Новая ракета павінна забяспечыць высокую выжывальнасць ва ўмовах сучаснай СПА. Дзякуючы стэлс-тэхналогіям, далёкасці палёту і здольнасці аўтаномна выбіраць маршрут, LRSO стане важнай часткай стратэгічнага ядзернага арсенала ЗША. Яна будзе непаражальнай для сістэм ранняга выяўлення, арыентаваных на балістычныя пагрозы, і здольнай дзейнічаць ва ўмовах радыёэлектроннага процідзеяння і адсутнасці GPS.

Ракета будзе несці абноўленую тэрмаядзерную боегалоўку W80-4 і ўвойдзе ў склад маштабнай праграмы Long Range Strike, у якую ўваходзяць стратэгічны бамбавік B-21 Raider, мадэрнізаваныя B-52 і новыя элементы кіравання і выведкі.

Хаця праграма застаецца ў значнай ступені засакрэчанай, вядома, што выпрабаванні ракеты ўжо вядуцца. LRSO павінна ўмацаваць паветраную кампаненту ядзернай трыяды ЗША, забяспечыўшы гнуткасць і магчымасць дэманстрацыі сілы без неадкладнага ўжывання зброі. Гэта робіць яе найважнейшым інструментам стратэгічнага стрымлівання ва ўмовах новай гонкі ўзбраенняў паміж вялікімі дзяржавамі.