Reuters: Краіны G7 гатовыя знізіць лімітавы кошт расейскай нафты

• 12.06.2025, 20:04

Нават без падтрымкі ЗША.

Большасць краінаў G7 гатовыя знізіць ліміт кошту расейскай нафты нават без падтрымкі Злучаных Штатаў Амерыкі.

Пра гэта паведамляе Reuters.

Чатыры крыніцы, знаёмыя з гэтым пытаннем, расказалі, што большасць краінаў «Вялікай сямёркі» гатовыя самастойна знізіць лімітавы кошт расейскай нафты ў рамках G7, нават калі прэзідэнт ЗША Дональд Трамп пастановіць адмовіцца ад гэтага.

Заўважым, што лідары краінаў G7 павінны сустрэцца 15–17 чэрвеня ў Канадзе, дзе абмяркуюць абмежаванне коштаў, якое было ўпершыню ўзгодненае ў канцы 2022 года.

Гэтае абмежаванне было распрацаванае, каб дазволіць продаж расейскай нафты трэцім краінам праз заходнія страхавыя паслугі пры ўмове, што кошт не будзе перавышаць 60 даляраў за бараль.

Аднак ужо некалькі тыдняў Еўрапейскі Звяз і Вялікая Брытанія настойваюць на зніжэнні кошту пасля таго, як падзенне сусветных коштаў нафты зрабіла цяперашняе абмежаванне 60 даляраў амаль неактуальным.

Ананімныя крыніцы заявілі, што ЕЗ і Вялікая Брытанія нават гатовыя ўзначаліць гэтую ініцыятыву і дзейнічаць самастойна, пры падтрымцы іншых еўрапейскіх краінаў G7 і Канады.

Крыніцы сказалі, што да гэтага часу незразумела, якую пастанову прымуць ЗША, хоць еўрапейцы настойваюць на адзінай пастанове на сустрэчы. Пазіцыя Японіі таксама застаецца нявызначанай.

«Еўрапейскія краіны імкнуцца знізіць ліміт кошту нафты з 60 да 45 даляраў. Ёсць пазітыўныя сігналы з Канады, Вялікай Брытаніі і, магчыма, Японіі. Мы выкарыстоўваем G7, каб паспрабаваць задзейнічаць ЗША», – сказала адна з крыніцаў.

Паводле звестак выдання, Белы Дом не даў ніякіх каментароў, але яшчэ падчас сустрэчы міністраў фінансаў G7 у канадскіх Скалістых гарах у мінулым месяцы міністр фінансаў ЗША Скот Бесэнт, паводле словаў крыніцаў, застаўся няўпэўненым у неабходнасці зніжэння ліміту.

Аднак, на думку суразмоўцаў выдання, некаторыя амерыканскія сенатары могуць падтрымаць гэтую ідэю, напрыклад Ліндсі Грэм, які нядаўна заявіў журналістам, што падтрымлівае зніжэнне абмежавання.

Крыніцы таксама адзначылі, што падтрымка Вашынгтона не з'яўляецца неабходнай для зніжэння ліміту праз дамінаванне Брытаніі ў сферы глабальнага страхавання марскіх перавозак і ўплыў ЕЗ на заходні танкерны флот, які прытрымліваецца правілаў.

Аднак ЗША маюць значэнне, калі гаворка ідзе пра плацяжы за нафту ў далярах і банкаўскую сістэму.