CNN: Масад ператварыў Іран у сваю «гульнявую пляцоўку»
- 14.06.2025, 11:03
Аперацыі ізраільскай выведкі становяцца ўсё больш публічнымі.
Ізраіль здзейсніў адну з самых маштабных аперацый у сваёй гісторыі, нанёсшы ўдар па ядзернай і вайсковай інфраструктуры Ірана. Але самым уражальным стала тое, што гэтая атака пачалася не з паветра - а знутры самой краіны, піша CNN.
Як паведамляюць крыніцы ў ізраільскіх службах бяспекі, спецагенты Масада загадзя праніклі на тэрыторыю Ірана, правезлі кантрабандную зброю, заклалі выбухоўку побач з ключавымі аб'ектамі СПА і стварылі базу для запуску дронаў. Гэтыя дзеянні паралізавалі сістэму абароны Ірана перад пачаткам масаванага авіяўдару.
Паводле афіцыйных звестак, у паветранай аперацыі ўдзельнічалі больш за 200 самалётаў, якія пацэлілі па больш як 100 цэлях. Высокадакладная зброя, дастаўленая Ізраільскім спецназам, была выкарыстаная для знішчэння іранскіх сістэм «зямля-паветра» паблізу Тэгерана. Дзякуючы гэтаму ВПС Ізраіля змаглі дзейнічаць практычна бесперашкодна - усе самалёты вярнуліся на базу без страт.
Адной з галоўных мішэняў сталі Іранскія вайсковыя камандзіры і навукоўцы, прынамсі, звязаныя з ядзернай праграмай. Са слоў крыніц, ізраільская выведка дзейнічала» ў самым сэрцы Ірана», напрыклад, у сталіцы - Тэгеране. Зафіксаваныя шматлікія выпадкі забойстваў і падрываў, знятыя на відэа і апублікаваныя самім ізраільскім бокам.
Гэтая аперацыя - кульмінацыя працяглага канфлікту паміж Ізраілем і Тэгеранам, які дзесяцігоддзямі адбываўся ў цені. Пачынаючы з 2007 года, Масад неаднаразова праводзіў на тэрыторыі Ірана забойствы ядзерных навукоўцаў, сярод якіх - Махсэн Фахрызадэ, знішчаны ў 2020 годзе. Таксама ў 2018 годзе агенты выкралі з Тэгерана цэлы ядзерны архіў - больш за 55 000 старонак і 55 000 файлаў, якія былі прадэманстраваныя на прэс-канферэнцыі тагачасным прэм'ерам Нэтаньяху.
У нядаўняй атацы загінуў і Ферэйдун Абасі - адзін з ключавых спецыялістаў іранскай ядзернай праграмы, які яшчэ ў траўні заяўляў, што ўдары па аб'ектах не паўплываюць на графік стварэння ядзернай зброі, бо «ядзерныя матэрыялы не захоўваюцца над зямлёй».
Холі Дагрэс, старшая навуковая супрацоўніца Вашынгтонскага Інстытута, адзначыла:
«Масад гадамі ставіўся да Ірана як да сваёй гульнявой пляцоўкі. Ад забойстваў да сабатажу - Ізраіль заўсёды меў перавагу ў гэтай ценявой вайне»
Паказальна, што яшчэ да пачатку атакі Ізраіль ліквідаваў лідара ХАМАС Ісмаіла Ханію - не ў Газе, а менавіта ў Тэгеране. Паводле інфармацыі з ізраільскіх крыніц, выбуховае прыстасаванне было закладзенае ў гасцявым доме, дзе той знаходзіўся, і актываванае дыстанцыйна ў патрэбны момант.
Нягледзячы на гучныя заявы іранскага боку аб абароне і адплаце, шматлікія правалы бяспекі сведчаць аб сур'ёзнай унутранай слабасці. Як заявіў былы намеснік кіраўніка Масада Рам Бэн Барак, поспехі ізраільскай выведкі тлумачацца не толькі прафесіяналізмам, але і «рэжымам, які ненавісны нават большасці ўласнага народа».
Пасля дзесяцігоддзяў ценявых дзеянняў аперацыі Масада цяпер становяцца публічнымі - і дэманструюць, што Ізраіль больш не гуляе ў ценявую гульню.