Перамовы паміж ЗША і Іранам па ядравай праграме скасаваныя

• 14.06.2025, 20:14

Гэта пацвердзіў кіраўнік МЗС Амана, які выступае пасярэднікам у перамовах.

ЗША і Іран не будуць праводзіць перамовы па іранскай ядравай праграме, якія былі запланаваны на нядзелю.

Гэта пацвердзіў міністр замежных спраў Амана, які выступае пасярэднікам у перамовах, Бадр аль-Бусаідзі, піша «Еўрапейская праўда».

Са слоў аль-Бусаідзі, перамовы паміж Іранам і ЗША, якія павінны былі адбыцца ў сталіцы Амана ў гэтую нядзелю, не адбудуцца.

Спецпасланнік прэзідэнта ЗША па Блізкім Усходзе Стыў Віткоф да апошняга быў гатовы да сустрэчы з прадстаўнікамі Ірана для працягу перамоў аб ядравай праграме Тэгерана.

Але на фоне ізраільскіх удараў па Іране прадстаўнік іранскага МЗС заявіў аб тым, што далейшыя ядравыя перамовы з ЗША з'яўляюцца "бессэнсоўнымі".

Раней, нагадаем, прэзідэнт ЗША Трамп заклікаў Іран заключыць ядравую дамову, пакуль "не стала позна".