Украінская СПА адбіла ракетна-дронавы шквал ворага

• 15.06.2025, 11:57

Мінус 167 цэляў.

Ноч на 15 чэрвеня стала сапраўдным выпрабаваннем для сістэмы паветранай абароны Украіны. Вораг выпусціў па тэрыторыі краіны 194 сродкі паветранага нападу – ад ударных дронаў да гіпергукавых ракетаў. Асноўнай мэтай стала Палтаўская вобласць, сярод іншага Крэменчуг.

Дэталі раскрыла раніцай прэс-служба Паветраных сілаў УСУ.

Атака пачалася блізу 20-й і доўжылася ўсю ноч. У небе над Украінай было зафіксавана:

– 183 ударныя дроны Shahed і беспілотнікі-імітатары розных тыпаў, запушчаныя з кірункаў Курск, Арол, Шаталава, Бранск, Мілерава і Прыморска-Ахтарск (РФ);

– 2 аэрабалістычныя ракеты Х-47М2 «Кінжал», выпушчаныя з тэрыторыі Астраханскай вобласці;

– 1 балістычная ракета «Іскандэр-М/KN-23» з Курскай вобласці;

– 4 крылатыя ракеты «Іскандэр-К» з Растоўскай вобласці;

– 4 крылатыя ракеты «Калібр», выпушчаныя з акваторыі Чорнага мора.

Украінская СПА дзейнічала па ўсіх кірунках: працавала авіяцыя, зенітныя ракетныя войскі, падраздзяленні радыёэлектроннай барацьбы і мабільныя агнявыя групы.

Вынікі ўражваюць: 167 з 194 варожых цэляў былі паспяхова знішчаныя. 119 цэляў збітыя сродкамі СПА. Яшчэ 48 заціснутыя сродкамі РЭБ ці лакацыйна страчаныя. Атрымалася нейтралізаваць 111 ударных дронаў Shahed і іншых БПЛА, 2 ракеты «Кінжал», 3 крылатыя ракеты «Іскандэр-К» і 3 ракеты «Калібр».

Нягледзячы на высокі ўзровень перахопу, у Крэменчугу зафіксаваныя прамыя траплянні, а таксама падзенні абломкаў у шасці лакацыях.

Па горадзе вораг ужыў адразу ўсе віды ўзбраення – ад «танных» дронаў да самых дарагіх гіпергукавых носьбітаў.