«Ніколі не шкадую грошай»

• 16.06.2025, 10:14

Беларусы паспрачаліся праз скошаную траву.

Пытанне кошту пакосу травы, асабліва актуальнае ў сувязі з нядаўнімі зменамі ў правілах добраўпарадкавання, працягвае хваляваць беларускіх уладальнікаў прыватных дамоў. Карыстальніца TikTok расказала пра свой досвед і кошты, з якімі ёй давялося сутыкнуцца, што выклікала бурнае абмеркаванне і спрэчкі ў каментарах пра тое, які ж кошт за сотку скошанай травы з'яўляецца справядлівым, піша «Тэлеграф».

У сваім відэа жанчына расказала, што ў траўні яна заплаціла за пакос травы на лецішчы на 7-8 сотках 60 рублёў (блізу 8 руб/сотка). «У прынцыпе, ок», - ацаніла яна тады гэты кошт. Аднак ужо ў чэрвені, пасля дажджоў, калі «трава вырасла», ёй трэба было скасіць 17-18 сотак, плюс каля 2-3 сотак каля дома.

Паводле ейных слоў, адзін чалавек, які прыйшоў скасіць 2 соткі, узяў з яе 40 рублёў. Гэты кошт яна палічыла «дарагаватым», таму на астатнія 18 сотак наняла іншага чалавека, якому заплаціла ўжо 200 рублёў. Разам, з пачатку чэрвеня ў яе сышло 240 рублёў на пакос.

Аўтарка відэа мяркуе, што гэта «вельмі дорага», і пры наступным пакосе яна будзе «плаціць нашмат менш». «Я думаю, што адэкватная [цана] не 10 рублёў, а дзесьці рублёў 5-6, ну хай там максімум 7-8», - падзялілася яна сваім меркаваннем, не ўдакладніўшы, як менавіта збіраецца зменшыць выдаткі.

«Купі трымер і касі сама»

Відэа выклікала актыўную дыскусію. Многія каментатары палічылі цэны, агучаныя аўтаркай, цалкам рынкавымі, а яе чаканні — далёкімі ад рэальнасці.

«Думаю, за 5-7 рублёў вы будзеце касіць самі», — напісаў адзін з карыстальнікаў.

«10 рублёў ужо не першы год — на сённяшні дзень гэтага ўжо мала, цану падымаць трэба», - адзначыў іншы.

Яшчэ адзін каментатар пагадзіўся:«10 рублёў прымальны кошт, але цяпер будуць браць больш, бо попыт на гэтую працу».

Прагучалі і заклікі шанаваць чужую працу: «Кожная праца павінна быць аплачаная. Вы самі паспрабуйце. Ацэніце сваю зробленую працу. І потым столькі ж заплаціце працаўніку. Будзе справядліва».

Адзін з карыстальнікаў падтрымаў гэтую думку: «Не ведаю, я ніколі не шкадую грошай работнікам, якія робяць цяжкую працу».

Некаторыя каментатары параілі аўтарцы набыць уласную тэхніку: «Купі трымер за 300 рублёў і касі сама».

«Столькі тэхнікі для скосу травы цяпер у крамах! Купіце на гэтыя грошы і адпачывайце з мінімальным намаганнем і свежым водарам травы! Бо гэта і карысна!»- падзяліўся знойдзенымі плюсамі яшчэ адзін карыстальнік.

Таксама нагадалі і аб выдатках саміх касцоў: «Ну як бы расходнікі дарагія».