Зяленскі прапанаваў кандыдатуру на пасаду генеральнага пракурора Украіны

• 16.06.2025, 11:43

Цяпер ён узначальвае падатковую службу.

Прэзідэнт Украіны Уладзімір Зяленскі прапануе парламенту Украіны падтрымаць кандыдатуру Руслана Краўчанкі на пасаду генеральнага пракурора Украіны. Пра гэта паведаміў старшыня Вярхоўнай Рады Украіны Руслан Стэфанчук у "Фэйсбуку".

«У адпаведнасці з пунктам 11 часткі першай артыкула 106 і часткі трэцяй артыкула 131-1 Канстытуцыі Украіны ў Вярхоўную Раду Украіны паступіла прадстаўленне прэзідэнта Украіны Уладзіміра Зяленскага аб выдачы згоды на прызначэнне Краўчанкі Руслана Андрэевіча на пасаду генеральнага пракурора», - напісаў старшыня ВР.

Стэфанчук адзначыў, што Вярхоўная Рада Украіны разгледзіць гэтае прадстаўленне на адным з найбліжэйшых пленарных пасяджэнняў.

Як вядома Руслан Краўчанка цяпер узначальвае Дзяржаўную падатковую службу, а перад гэтым быў кіраўніком Кіеўскай абласной вайсковай адміністрацыі. Яму 35 гадоў.

У 2021 годзе Руслан Краўчанка ўзначаліў Бучанскую акруговую пракуратуру Кіеўскай вобласці. З 31 сакавіка 2022 года праводзіў фіксацыю і расследаванне вайсковых злачынстваў расейцаў у Бучы.