Ля будынка Нацыянальнага банка зноў назіраецца ажыятаж

• 16.06.2025, 17:29

Людзі масава купляюць юбілейныя банкноты.

Ля будынка Нацыянальнага банка зноў назіраецца ажыятаж - людзі масава купляюць юбілейныя банкноты, прысвечаныя «80-годдзю Перамогі».

У прэс-службе Нацбанка паведамілі, што толькі за тры дні прадалі 1 647 купюр на агульную суму амаль 198 тысяч рублёў.

Памятная банкнота наміналам 80 рублёў прадаецца коштам 120 рублёў. Першую партыю раскупілі вельмі хутка, таму з 11 чэрвеня завезлі другую.

Гэта тыя самыя банкноты, дзеля якіх людзі стаялі ў велізарнай чарзе і дзяжурылі па начах. У траўні таксама быў уведзены ліміт - да пяці банкнот у адны рукі, праз гэта некаторыя пакупнікі прыводзілі з сабой сваякоў, каб купіць больш купюр.

Купюра выканана ў ружовым колеры. На адным баку намаляваны манумент «Мужнасць» у Берасцейскай цытадэлі, а на адваротным — рука маці з дзіцем, нацыянальны арнамент, «Брама Менска» і кветка яблыні. Усяго надрукавана 80 тысяч такіх банкнот.

Акрамя таго, у продаж паступілі памятныя манеты, таксама прысвечаныя таму ж юбілею. Сярод іх:

сярэбраная манета наміналам 20 рублёў (тыраж - 2500 штук);

медна-нікелевая манета наміналам 1 рубель (тыраж — 5000 штук).

Калекцыянеры працягваюць стаяць у чэргах, каб атрымаць гэтыя эксклюзіўныя асобнікі.