СМІ: У Іране ліквідаваны сябра Лукашэнкі Махмуд Ахмадзінежад

• 17.06.2025, 20:36

Былы кіраўнік Ірана быў забіты на вуліцы ў Тэгеране.

Арабскія СМІ паведамляюць у аўторак, 17 чэрвеня, што Ізраіль ліквідаваў былога прэзідэнта Ірана Махмуда Ахмадзінежада ў Тэгеране.

Пра ліквідацыю Ахмадзінежада таксама паведаміў ізраільскі «9-ы канал», спасылаючыся на крыніцы ў Іране.

Паводле іншай інфармацыі, былы палітык быў забіты ў выніку страляніны на вуліцы.

За час свайго прэзідэнцтва Ахмадзінежад часта зазнаваў міжнародную крытыку, сярод іншага за агрэсіўныя антысеміцкія выказванні.

Ахмадзінежад займаў два чатырохгадовыя тэрміны пасаду прэзідэнта – з 2005 да 2013 года. Ягонае спрэчнае перавыбранне ў 2009 годзе справакавала масавыя пратэсты ў краіне, падчас якіх былі забітыя дзясяткі і затрыманыя тысячы людзей. Экс-прэзідэнт Ірана скандальна вядомы, сярод іншага, тым, што ставіў пад сумненне Халакост, называў тэракты 11 верасня фальсіфікацыяй і абяцаў знішчыць Ізраіль.

Будучы прэзідэнтам, Ахмадзінежад прыязджаў у Беларусь, дзе сустракаўся з Аляксандрам Лукашэнкам. Кіраўнікі неаднаразова заяўлялі пра «сяброўства» і абяцалі аказваць узаемную падтрымку адзін аднаму на міжнароднай арэне.

Ахмадзінежад і Лукашэнка разам таксама былі на пахаванні дыктатара Венесуэлы Уга Чавеса ў 2013 годзе.