Axios: Трамп разгледзіць магчымасць удараў ЗША па ядзерных аб'ектах Ірана

• 17.06.2025, 21:06

Раней ён заявіў пра неабходнасць «безумоўнай капітуляцыі» Ірана.

Прэзідэнт ЗША Дональд Трамп разглядае магчымасць удзелу ЗША ў ваеннай аперацыі Ізраіля супраць Ірана і нанясенні ўдараў па ядзерных аб'ектах Ісламскай Рэспублікі, піша Axios са спасылкай на трох афіцыйных асобаў ЗША.

Амерыканскія вайсковыя сілы могуць ударыць па падземным заводзе ўзбагачэння ўрану ў Форда. Гэты завод пабудаваны недалёка ад горада Кум, прыкладна за 160 км ад Тэгерана.

Да гэтага Трамп заявіў пра «абсалютны» кантроль над паветранай прасторай Ірана, падкрэсліўшы, што іранская зброя моцна саступае ў якасці амерыканскай, і запатрабаваў капітуляцыі Ірана.

Два дні таму, 15 чэрвеня, Axios даведаўся пра просьбу Ізраіля да ЗША далучыцца да ўдараў па Іране. Тады ў Вашынгтоне заявілі, што не разглядаюць такую магчымасць. Крыніца партала падкрэсліла, што самы хуткі спосаб для Ірана дасягнуць міру – «адмовіцца ад сваёй праграмы стварэння ядзернай зброі».