«Магутная балістыка ўзарвала ўмацаванні РФ»

• 18.06.2025, 11:08

Украінскі генерал расказаў пра дэталі ўдару ракеты «Сапсан».

Ракета ўкраінскага аператыўна-тактычнага ракетнага комплексу Сапсан, вядомага за мяжой пад назвай Гром-2, здольная рухацца па аэрабалістычнай траекторыі, выконваючы нечаканыя манеўры, што робіць яе складанай мэтай для супрацьракетных сістэм, расказаў вайсковы аналітык Дзмітрый Снегіроў.

Такая здольнасць істотна павялічвае імавернасць пераадолення варожай СПА. Падобнымі характарыстыкамі валодае і расейскі АТРК Іскандэр. Паводле яго слоў, рэальная далёкасць Сапсана можа дасягаць 500 км, што ставіць яго ў адзін шэраг з нямецкімі ракетамі Taurus і пераўзыходзіць Амерыканскія ATACMS, далёкасць якіх складае да 300 км, паведамляе Telegraf.

Снегіроў удакладніў, што ў зоне дзеяння ракеты могуць апынуцца расейскія вайсковыя аэрадромы, уключаючы Мілерава і Балтымор, дзе базуецца франтавая авіяцыя, якая актыўна выкарыстоўваецца для ўдараў па пазіцыях УСУ з выкарыстаннем карэктаваных авіябомбаў (КАБаў і ФАБаў).

Таксама ў радыус знішчэння трапляюць тылавыя базы як на акупаваных, так і расейскіх тэрыторый. На ягоную думку, наяўнасць уласнай балістычнай ракеты ва Украіне можа істотна падарваць лагістыку супраціўніка і змяніць палітычную сітуацыю, пазбавіўшы Расею магчымасці навязваць ультыматумы.

Вайсковы экспэрт Валерый Рабых з Defense Express дадаў, што дзякуючы магутнаму боенабою (ад 500 кг да 1 тоны) і вялікай далёкасці паразы, Сапсан можа адыграць ключавую ролю ў пераходзе Украіны ад абарончай стратэгіі да стратэгічнага наступу.

Адзін з распрацоўнікаў ракеты, генерал-лейтэнант у адстаўцы Ігар Раманенка, паведаміў у эфіры тэлеканала FREEOM, што праект Сапсан быў ініцыяваны яшчэ ў 2006 годзе.

З пачаткам поўнамаштабнай вайны праект атрымаў новы імпульс. Са слоў Раманенкі, у 2023 годзе прайшлі паспяховыя выпрабаванні ракеты, а ў траўні 2024 года – ужо баявыя пускі на адлегласць 300 км. Тады Сапсан знішчыў расейскі камандны пункт і пускавыя ўстаноўкі комплексаў Іскандэр. Хоць раней праект абмяжоўвалі рамкамі далёкасці да 270 км, яшчэ тады ў канструкцыю закладваўся патэнцыял на 500 км.

Сярод моцных бакоў комплексу - магутная баявая частка і ўдасканаленая сістэма навядзення. Цяпер Украіна працуе над нарошчваннем вытворчасці: мэта — выпускаць спачатку дзясяткі, а ў будучыні — сотні такіх ракет на месяц. Са слоў Раманенкі, аднымі толькі беспілотнікамі і крылатымі ракетамі, накшталт «Нептуна», задачу нанясення дальнабойных удараў не развязаць.