Банкрутуецца адзін з самых вядомых футбольных клубаў Беларусі
- 18.06.2025, 18:46
Што пра гэта вядома.
Футбольнаму клубу «Шахцёр» з Салігорска пагражае банкруцтва. У дачыненні да гэтай спартовай арганізацыі запусцілі працэдуру эканамічнай неплатаздольнасці - у яе назапасіліся запазычанасці, якія перавышаюць 16 млн рублёў. Пра гэта паведамляецца на сайце Адзінага дзяржрэестра звестак аб банкруцтвах.
Эканамічны суд Менскай вобласці 11 чэрвеня адкрыў конкурсную справу што да футбольнага клуба «Шахцёр». З такой заявай звярнулася кіраўніцтва спартовай арганізацыі, піша «Зеркало».
Даведка. Конкурсная справа - працэдура эканамічнай неплатаздольнасці. Яе праводзяць для таго, каб задаволіць патрабаванні крэдытораў, абараніць правы завінавачанага, а таксама крэдытораў пры санацыі (аздараўленні). Калі немагчыма правесці санацыю ці адсутнічаюць для яе падставы, то запускаецца ліквідацыйная справа завінавачанага.
У судзе высветлілася, што агульная запазычанасць футбольнага клуба перавышае 16,4 млн рублёў. Прычым па большай суме - амаль на 14,7 млн рублёў - ужо прайшоў крайні тэрмін для вяртання. Асноўная пазыка клуба - амаль 8,8 млн рублёў - перад транспартнай кампаніяй «Калійспецтранс». Заснавальнік гэтай фірмы, паводле звестак сэрвісу legat.by, — «Беларуськалій».
Пры гэтым кошт актываў футбольнага клуба складае без малога 6,3 млн рублёў. Гэта значыць, гэтай сумы недастаткова, каб ліквідаваць усе пазыкі.
У штаце клуба, як агучылі ў Эканамічным судзе Менскай вобласці, значыцца 20 чалавек, двое з іх знаходзяцца ў дэкрэтным адпачынку.
«Шахцёру» прызначалі антыкрызіснага кіраўніка, які да 25 верасня гэтага года сярод іншага павінен даць справаздачу, як ідзе конкурсная справа, а таксама падаць план ліквідацыі клуба.
Як у апошнія гады складваецца лёс салігорскага «Шахцёра»
«Шахцёр» — адзін з самых вядомых і тытулаваных клубаў Беларусі, які ў апошнія дзесяцігоддзі стала змагаўся за чэмпіёнства краіны - і тройчы яго здабываў (у 2005, 2020 і 2021 гадах). Яшчэ шэсць разоў ён станавіўся сярэбраным прызёрам і восем разоў займаў трэцяе месца. Каманда тройчы брала Кубак Беларусі і двойчы — Суперкубак.
Яшчэ адносна нядаўна — увосень 2022 года - «Шахцёр» стаў чэмпіёнам Беларусі трэцім разам запар (і ў чацвёрты агулам). Другое месца заняў Менскі «Энэргетык-БДУ», трэцяе — барысаўскі БАТЭ, які апярэдзіў па дадатковых паказчыках менскае «Дынама». Пятую пазіцыю тады заняла «Іслач». Але ў траўні 2023 года стала вядома, што каманду з Салігорска пазбавілі залатых медалёў чэмпіянату Беларусі — 2022, а «Энэргетык-БДУ» — сярэбраных. Пры гэтым камандам не дазволілі ўдзельнічаць у еўракубках летам 2023-га і пазбавілі балаў.
У сваёй пастанове федэрацыя футбола абапіралася на звесткі Следчага камітэта аб тым, што «кіраўніцтвам „Шахцёра“ былі арганізаваныя дамоўныя матчы, а таксама ажыццяўлялася неправамернае фінансавае стымуляванне каманд вышэйшай лігі». У сувязі з рэзананснай справай сілавікі затрымлівалі былога спартовага дырэктара «гарнякоў» Уладзіміра Нідэргаўса, якога прысудзілі да штрафу 5000 базавых адзінак (185 000 рублёў), і экс-дырэктара «Шахцёра» Аляксандра Марчанку, з якога пазней знялі абвінавачванні.
А ў траўні 2024 года дысцыплінарныя захады на салігорскі клуб наклаў УЕФА (Саюз еўрапейскіх футбольных асацыяцый). Прычынай стала пратэрмінаваная крэдыторская запазычанасць. «Шахцёр» аштрафавалі на мільён еўраў і на год адхілілі ад еўракубкаў.
У лютым гэтага года аб фінансавай сітуацыі з «Шахцёрам» выказваўся кіраўнік Беларускай федэрацыі футбола Мікалай Шарстнёў: «Разглядаюцца нейкія пэўныя пытанні будучага клуба. Ёсць праблемы, гэта не сакрэт, найвелізарная запазычанасць. Якія пастановы прыме кіраўніцтва? Так, яны ўзгадняюць сёння з намі пэўныя варыянты, мы іх шукаем».
У лютым таксама абмяркоўвалася, ці будзе каманда выступаць у гэтым сезоне ў Першай лізе. Аднак у выніку гэтага клуба не выявілася ў ліку ўдзельнікаў турніру. У сакавіку стала вядома, што ў горадзе калійнікаў стварылі новую футбольную каманду — «Салігорск», у якую трапілі некаторыя гульцы з «маладзёжкі» «Шахцёра» і іншага мясцовага клуба «Партызан» (апошні спыніў існаванне).