«Рабаў, ты адкажаш за такое надвор'е»

• 18.06.2025, 20:16

Вядомы сіноптык расказаў, якія прэтэнзіі прад'яўляюць яму беларусы.

Сіноптык Зміцер Рабаў у эфіры тэлеканала АНТ прызнаўся, якія прэтэнзіі прад'яўляюць яму беларусы праз дрэннае надвор'е.

Рабаў расказаў, як складае прагноз надвор'я для беларусаў:

«Кожны дзень праглядаю зводкі, лікавыя мадэлі і на падставе гэтага аналізую, якое надвор'е чакае нас у найбліжэйшы час, браць з сабой парасон ці не, як апранацца».

Але часам, паводле словаў тэлесіноптыка, літаральна кожны дзень яму даводзіцца чуць і прэтэнзіі землякоў:

«Асабліва, калі дрэннае надвор'е, то вінаваты Рабаў. Як бы: "Рабаў, ты адкажаш за такое надвор'е"».

Зрэшты, дадае Зміцер Рабаў, усё гэта гучыць добразычліва.

«Людзі практычна штодня мяне пазнаюць і просяць расказаць, якое надвор'е будзе найбліжэйшым часам, – кажа зорка АНТ. – Напрыклад, вясна. Усіх хвалюе дачнае пытанне, людзі пытаюцца, калі саджаць ці пачакаць яшчэ крышку, калі спыняцца дажджы, якое будзе лета. Усіх цікавіць надвор'е. Дзеці з'язджаюць у летнікі, і бацькі пытаюцца, як апранаць дзіця, ці будзе там холадна. У такім плане, ведаеш. Бліжэй да восені – пытанні аўтамабільныя. Калі мяняць колы? Зімой таксама свае пытанні».

Вынік адказаў на такія простыя жыццёвыя пытанні – добры настрой суразмоўцы. Дарэчы, сіноптык зазначыў, што ягонае жыццё не адрозніваецца ад жыцця большасці беларусаў – паездкі ў транспарце, паходы ў крамы і на рынкі, выходныя на лецішчы.