Генерал уцякач войска Асада перабіваецца ў РФ выпадковымі заробкамі

• 18.06.2025, 21:03

Яго пасялілі ў Свярдлоўскай вобласці.

У Свярдлоўскай вобласці ў якасці бежанца пасяліўся генерал войска былога дыктатара Сірыі Башара Асада, піша 66.RU. Ён перабіваецца выпадковымі заробкамі, гадуе на градках бульбу і часнок і плануе перавезці ў Расею сваю сям'ю, якая пакуль застаецца на радзіме. Вайсковец, які папрасіў называць яго Ваўком, пагадзіўся расказаць парталу пра сваё жыццё пасля ўцёкаў пры ўмове ананімнасці з асцярог за бяспеку родных.

Як растлумачыў журналістам, пад паклічам «Воўк» яго ведалі расейцы, з якімі ён працаваў у Сірыі. У Свярдлоўскую вобласць ён трапіў у сакавіку сярод першых вымушаных перасяленцаў, якіх пасля падзення рэжыму Асада размеркавалі на 12 расейскіх рэгіёнаў.

Генерал у свой час вучыўся ў савецкім Ленінградзе, ведае расейскую мову і сцвярджае, што падтрымлівае сувязь праз тэлефон «з вельмі высокімі людзьмі ў Расеі».

На момант узяцця Дамаска ўзброенымі спаборнікамі Асада 8 снежня 2024 года ён працаваў у адным са штабоў сірыйскага войска. Як расказвае генерал, усе, акрамя яго, беглі з месца службы, а ён сыходзіў апошнім. Тое, што здарылася, суразмоўца партала назваў «здрадай». Пасля гэтага ён схаваў жонку і дзяцей, а сам разам з сястрой і пляменнікамі дабраўся да расейскай авіябазы Хмеймім у правінцыі Латакія. Паводле ягоных словаў, менавіта там былыя сірыйскія чыноўнікі і вайскоўцы ратаваліся ад вулічных расправаў.

З Сірыі бежанцаў даставілі на Чкалаўскі вайсковы аэрадром пад Масквой, пасля чаго генерал, паводле ягоных словаў, тры тыдні жыў у пункце часовага размяшчэння ў Каломне, а потым трапіў у Екацерынбург. Там сірыйцаў на некаторы час «вельмі добра размясцілі» ў гатэлі, а пазней перавезлі ў санаторый пад Таліцай (горад паміж Екацерынбургам і Цюменню). Генерал расказаў, што там пасялілі блізу сотні бежанцаў, якія размаўлялі толькі паміж сабой на арабскай і нічога не рабілі. Суразмоўца партала назваў гэта «самым страшным».

«Так яны ніколі не змогуць адаптавацца да расейскага грамадства. Калі чалавек нічым не займаецца – гэта самае страшнае», – растлумачыў ён.

Паводле аповеду «Ваўка», калі санаторый наведала ўпаўнаважаная ў правах чалавека ў Свярдлоўскай вобласці Таццяна Мерзлякова, ён папрасіў яе дапамагчы знайсці яму іншае месца. Такім чынам генерал апынуўся ў прытулку рэгіянальнай грамадскай арганізацыі дапамогі вымушаным перасяленцам «Уральскі дом». Мужчыну з сястрой і пляменнікамі пасялілі ў трохпакаёвай кватэры на тэрыторыі сховішча, размешчанага ў прамзоне на ўскраіне горада Зарэчны каля Белаярскага вадасховішча.

Паводле словаў сірыйца, ён афармляе від на жыхарства і зарабляе адлівам плітаў для садовых дарожак, гэтых грошай яму і родным стае на ўсё неабходнае. У вольны час былы вайсковец арміі Асада гадуе гародніну і зеляніну ў агародзе, які сам узараў на двары. Надалей ён плануе афіцыйна працаваць на заводзе ці фабрыцы і зняць жыллё, каб забраць да сябе з Сірыі жонку і дзяцей.

Як сцвярджае генерал, ён не плануе вяртацца на радзіму нават калі гэта будзе бяспечна. Ён сказаў, што не разумее, чаму вайсковае кіраўніцтва нічога не зрабіла для абароны Дамаска.