Сабаленка перамагла ў матчы, які расцягнуўся на два дні

• 19.06.2025, 19:09

Беларуска перамагла швэйцарскую тэнісістку.

Беларуская тэнісістка і першая ракетка свету Арына Сабаленка паспяхова выйшла ў чвэрцьфінал турніру WTA 500 Berlin Tennis Open by Hylo, які праходзіць у сталіцы Нямеччыны з 16 да 22 чэрвеня.

У матчы 1/8 фіналу Сабаленка ўпэўнена падолела прадстаўніцу Швэйцарыі Рэбеку Машараву (112-я ў рэйтынгу WTA).

Сустрэча, якая пачалася 18 чэрвеня, была перапыненая пасля першага сэту праз небяспечна слізкае пакрыццё корта, пры гэтым беларуска вяла-6:2.

На наступны дзень, 19 чэрвеня, матч быў адноўлены.

У другім сэце Машарава надала больш сур'ёзны супраціў, але Сабаленка здолела давесці справу да перамогі на тай-брэйку– 7:6 (8:6). Агульная працягласць паядынку склала 1 гадзіну 53 хвіліны.

У чвэрцьфінале Арына Сабаленка сустрэнецца з пераможцай матчу паміж Аленай Рыбакінай (Казахстан, №11 WTA) і Кацярынай Сіняковай (Чэхія, №74 WTA).

Прызавы фонд турніру складае €925 661, а пераможца атрымае €142 610. Дзейнай чэмпіёнкай спаборніцтваў застаецца амерыканка Джэсіка Пегула, якая ў фінале 2024 года падолела расейку Ганну Калінскую– 6:7 (0:7), 6:4, 7:6 (7:3).