МУС правяло рэйд па мігрантаў на менскім рынку

• 2.06.2025, 18:08

Не абышлося без праблемаў і ў беларусаў.

Супрацоўнікі падраздзяленняў грамадзянства і міграцыі МУС правялі рэйд у выставачным цэнтры «Экспабел» у Менскім раёне, каб пракантраляваць законнасць знаходжання і працы іншаземцаў, паведамляе БелТА. Былі змушчаныя да адказнасці ў тым ліку двое грамадзянаў Беларусі.

У рамках праверкі на агароднінных і рэчавых рынках, а таксама ў гандлёвым цэнтры «Экспабел» было агледжана 18 гандлёвых пунктаў і апытаныя 48 мігрантаў. У большасці правераных дакументы былі ў парадку: або пры сабе, або ў выглядзе копій, або ў электронным фармаце. У выпадку сумненняў інспектары звяралі звесткі з дзяржаўнай базай, дзе ўказана, ці мае чалавек дазвол на працу або апавяшчэнне ад наймальніка.

Без парушэнняў не абышлося: было складзена дзевяць пратаколаў. Сем – у дачыненні да замежных грамадзянаў, якія працавалі без дазволу ці не паводле заяўленай спецыяльнасці. Таксама змушаныя да адміністрацыйнай адказнасці двое грамадзянаў Беларусі – кіраўнікі арганізацый, якія прынялі гэтых супрацоўнікаў. Усе прызналі віну і паабяцалі прыбраць парушэнні. Акрамя штрафаў, з імі правялі тлумачальныя размовы.

Адзначаецца, што падобныя рэйды – звычайная практыка. Толькі ў траўні 2025 года праверкі таксама прайшлі на рынках «Новы Лебядзіны» і «Малінаўка».

Усяго за першыя пяць месяцаў 2025 года ў Менскай вобласці іншаземцам выдалі 992 спецыяльныя дазволы на працоўную дзейнасць. Цяпер у рэгіёне ўвесь час жыве больш за 28 тысячаў грамадзянаў іншых краінаў.

Нагадаем, у красавіку Аляксандр Лукашэнка заявіў пра запрашэнне ў краіну «можа быць, 120–150 тысячаў гэтых спецыялістаў» з Пакістана. У выніку пачалі з'яўляцца відэа з асцярогамі з нагоды прыезду вялікай колькасці замежнікаў.

Пасля гэтага сілавікі сталі рэгулярна публічна даваць справаздачу аб «прафілактычных мерапрыемствах» і затрыманнях. Так, у Віцебску ўжо пагражалі высылкай замежным таксістам, прычым як мінімум двойчы. У Берасці мігранта з Туркменістана судзілі за парушэнне ПДР перад замежнымі студэнтамі.

Паведамлялася пра выдварэнне з Беларусі чатырох грамадзянаў Самалі, а яшчэ трох мараканцаў, якія пабіліся ў Гомелі (у сацсетках іх спачатку называлі пакістанцамі). Нядаўна ў Мачулішчах пад Менскам сілавікі знайшлі мігрантаў з Афганістана і Пакістана, якія збіраліся ў Еўразвяз.