У Менску арудуе маньяк?

• 20.06.2025, 12:30

Вось што адказалі ў міліцыі.

Менская міліцыя адпрэчыла інфармацыю, якая распаўсюджваецца ў Telegram-чатах і сацсетках пра нібыта маньяка ў Менску, які, па чутках, забіў і расчляніў 20 маладых дзяўчат. У міліцыі заявілі, што крымінагенная абстаноўка ў сталіцы застаецца спакойнай і кантраляванай.

«Серыйных забойстваў у Менску не ўчынялася», - гаворыцца ў афіцыйнай заяве.

Таксама ў міліцыі ўдакладнілі, што фатаграфіі і відэа, якія суправаджалі такія паведамленні, сапраўды паказваюць загінулых людзей. Аднак у кожным з гэтых выпадкаў смерць наступіла не ў выніку злачынства. Гэтыя матэрыялы, як падкрэслілі ў ведамстве, былі выкарыстаныя «для ўзмацнення эфекту», але не звязаныя з серыйнымі забойствамі.

На гэты момант міліцыя праводзіць праверку і ўстанаўлівае, хто менавіта стаіць за распаўсюджваннем ілжывай інфармацыі. Ведамства нагадала, што за такія дзеянні прадугледжаная крымінальная адказнасць.