Намеснік Келага падзяліўся дэталямі вызвалення беларускіх палітвязняў

• 21.06.2025, 21:25

Яны да апошняга не ведалі, што іх чакае.

Джон Коул, намеснік спецыяльнага прадстаўніка прэзідэнта ЗША Кіта Келага раскрыў дэталі вызвалення 14 беларускіх палітвязняў. Відэа ён апублікаваў на сваёй старонцы ў сацсетцы X.

«Момант, які я асабліва запомніў, гэта калі пад'ехаў фургон з гэтымі 14 людзьмі на прасёлкавую дарогу, дзе мы іх сустракалі. Я адчыніў дзверы, і ва ўсіх у іх галовы былі апушчаны. Яны не разумелі, што адбываецца», - распавёў Джон Коул.

«Я сказаў: «Вы вольныя, вы вольныя». Некаторыя з іх размаўлялі па-ангельску - яны зразумелі і перадалі астатнім. І ўсё змянілася, таму што [да гэтага] яны не ведалі, куды іх вязуць - магчыма, думалі, што ў нейкае жудаснае месца»

Намеснік спецыяльнага прадстаўніка Кіта Келага распавёў, што ўсіх палітвязняў везлі «як сапраўдных зняволеных» з рукамі за спінай. "Калі яны пачулі, што вольныя, - яны былі ў захапленні", - удакладніў ён.