Добрыя навіны!

• Андрэй Саннікаў
• 22.06.2025, 12:18

Для Беларусі надышоў вельмі важны, гістарычны момант.

Лідар грамадзянскай кампаніі «Еўрапейская Беларусь» Андрэй Саннікаў адрэагаваў на вызваленне Сяргея Ціханоўскага і яшчэ 13 беларускіх палітвязняў:

– Добрыя навіны!

Вельмі рады за Сяргея і астатніх, вырваных з кіпцюроў ДПУ.

Сяргей, шчыра рады бачыць цябе жывым!

Амерыканцы даказалі, што менавіта яны маюць рэальныя магчымасці вызваліць усіх палітвязняў у Беларусі.

Спрацавалі санкцыі і просьба рэжыму Лукашэнкі дапамагчы з-пад гэтых санкцыяў выпаўзці. Менавіта таму Лукашэнка выпусціў Сяргея, таго, каго вельмі хацеў забіць. Як забіў ненавіснага яму Алеся Пушкіна.

Цяпер вельмі важны, гістарычны момант: вызваленне аднаго з лідараў рэвалюцыі 2020 года можа стаць зыходным пунктам або для прадаўжэння гандлю жыццямі людзей з боку дыктатуры, або для пачатку кардынальных пераменаў у Беларусі.

І ў гэтым ЗША, якія даказалі свой уплыў, могуць стаць ключавым чыннікам пераменаў і ў Беларусі, і, праз Беларусь, – ва ўсім рэгіёне.