Еўрапейцы выказаліся аб абавязковай вайсковай службе і стаўленні да Трампа

• 23.06.2025, 16:37

Апытанне ахапіла больш за 16 тысяч чалавек у 12 краінах.

На фоне агрэсіўнай палітыкі Расеі і пазіцыі прэзідэнта ЗША Дональда Трампа, жыхары Еўропы падтрымалі павелічэнне абаронных бюджэтаў і нават абавязковай вайсковай службы, паводле апытання, праведзенага Еўрапейскай радай у міжнародных дачыненнях (ECFR), піша брытанскі The Guardian (пераклад — сайт Charter97.org).

Найбольшую падтрымку павелічэнню выдаткаў выказалі жыхары Польшчы (70%), Даніі (70%) і Вялікай Брытаніі (57%). У Нямеччыне, Гішпаніі і Францыі доля прыхільнікаў таксама значная - блізу 45-47%. Італія засталася ў меншасці: толькі 17% выказаліся "за", а 57% - супраць.

Абавязковая вайсковая служба атрымала падтрымку ў Польшчы (51%), Нямеччыне (53%) і Францыі (62%), асабліва сярод пажылых рэспандэнтаў. Аднак моладзь 18-29 гадоў у большасці краін выступіла супраць. У Вялікай Брытаніі, Італіі, Гішпаніі і Вугоршчыне ідэю прызыву падтрымлівае меншасць.

Апытанне таксама паказала, што думкі аб Трампе значна падзяліліся: нават у традыцыйна праамерыканскіх краінах, як Нямеччына і Вялікая Брытанія, большасць лічаць палітычную сістэму ЗША неэфектыўнай. У Даніі доля такіх складае 86%, а 76% рэспандэнтаў лічаць перавыбранне Трампа няўдачай для ЗША.

Асобна адзначаецца, што еўрапейцы ў большасці краін выступаюць супраць палітыкі Трампа па Украіне, у тым ліку супраць зняцця санкцый з Расеі.

Апытанне ахапіла больш за 16 тысяч чалавек у 12 краінах. Яго вынікі агучаны напярэдадні саміту NATO, дзе будзе абмяркоўвацца павелічэнне абаронных расходаў да 5 працэнтаў ВУП да 2032 года.