«Пуцін трапіў у пастку Трампа»

• 24.06.2025, 13:05

Кіраўнік Крамля здрадзіў Ірану.

Хаўрус Расеі ды Ірана знішчаны, так званая «вось зла» спыніла сваё існаванне. І гэта шмат у чым заслуга амерыканскага прэзідэнта Дональда Трампа.

Такое меркаванне ў сваім блогу выказаў расейскі эканаміст Вячаслаў Шыраеў.

Ён прапанаваў цікавую тэорыю, якая шмат у чым тлумачыць празмернае падлашчванне Трампа з Крамлём. Ёсць падставы меркаваць, што такім чынам кіраўнік ЗША заганяў дыктатара РФ у пастку.

«Пуцін апынуўся ў пастцы, паверыўшы ў спектакль, разыграны з мэтай ізаляваць Іран у момант атакі ЗША на ядзерныя аб'екты. Высветлілася, што, калі Трамп казаў пра «яшчэ не прынятую пастанову аб удары», ён ужо дакладна ведаў яго дату. І план быў распрацаваны даўно. Часткай гэтага плана была «ўгода з РФ»: Уіткаф прывозіў у Крэмль прывабныя прапановы з мэтай дамагчыся «нейтральнага статусу» РФ у ірана-амерыканскім канфлікце. Уяўны «хаўрус з Трампам» не дазваляе Маскве паспяшацца на дапамогу Тэгерану», — адзначыў Шыраеў.

У выніку Пуцін сапраўды здрадзіў свайму хаўрусніку Ірану ў надзеі на «дамову» з Вашынгтонам. У Тэгеране ўжо разглядаюць Расею як «здрадніцу» за адмову ў вайсковай дапамозе.

«У выніку разбураная «вось зла», якую Пуцін ствараў доўгія гады. Усе дэманічныя рэжымы цяпер адчуваюць сябе ўразлівымі, а стаўленне Трампа да вайны ва Украіне зменіцца пасля заканчэння «іранскай спецаперацыі». Пуцін перастане быць цікавы Вашынгтону», - выказаў меркаванне блогер.