У Беларусь прыляціць прэзідэнт Кубы

• 24.06.2025, 19:38

Дыяс-Канэль Бярмудэс правядзе сустрэчу з Лукашэнкам.

Прэзідэнт Кубы Мігель Дыяс-Канэль Бярмудэс прыляціць з афіцыйным візітам у Менск, пра гэта паведаміла прэс-служба Лукашэнкі.

Чакаецца, што 25 чэрвеня госць правядзе ў Палацы незалежнасці перамовы з беларускім дыктатарам.

Бакі абмяркуюць «крокі па далейшым умацаванні двухбаковага дыялогу з акцэнтам на развіццё гандлёва-эканамічнага і навукова-тэхнічнага супрацоўніцтва», а таксама «разгледзяць пытанні глабальнага і рэгіянальнага парадку дня, узаемадзеянне дзвюх краін на шматбаковых пляцоўках».

«Праграмай афіцыйнага візіту прэзідэнта Кубы ў Беларусь запланаванае наведванне прадпрыемстваў машынабудаўнічай і фармацэўтычнай галін, а таксама ўдзел у Еўразійскім эканамічным форуме і пасяджэнні Вышэйшага Еўразійскага эканамічнага савета», - паведамілі ў прэс-службе Лукашэнкі.