У Беларусі імкліва пусцеюць працоўныя месцы

• 25.06.2025, 17:53

Больш за ўсё працоўных «знікла» ў Менску.

У Беларусі прадаўжае расці дэфіцыт кадраў. Так, на 25 чэрвеня агулам краіне патрэбна амаль 212,7 тысячы работнікаў. Гэтулькі прапаноў ад наймальнікаў размешчана ў агульнарэспубліканскім банку вакансій, піша «Зеркало».

На 25 чэрвеня на момант публікацыі гэтага тэксту ў Беларусі адкрыта 212 691 вакансія. Для параўнання: на 31 траўня патрабаваліся 209284 работнікі.

Больш за ўсё кадраў цяпер патрабуецца ў Менску - 58 861. Для параўнання: на 20 траўня ў сталіцы было 56,4 тысячы прапаноў для суіскальнікаў.

У Менскай вобласці, напрыклад, на 25 чэрвеня патрэбна амаль 35,2 тысячы работнікаў, у Берасцейскай - 26,7 тысячы, у Віцебскай - амаль 22,7 тысячы.

Раней у Мінпрацы звярталі ўвагу, што ў Менску патрабуецца больш за ўсё працаўнікоў - блізу чвэрці ад усіх вакансій па краіне. Асабліва патрэбныя ў сталіцы кадры ў сферы IT, гандлі і медыцыне.