NYT: Вярхоўны лідар Ірана Хамэнэі знік, паніка нарастае

• 26.06.2025, 12:50

У краіне актывізаваліся ўнутраныя фракцыі.

Вярхоўны лідар Ірана Алі Хаменеі не з'яўляецца на публіцы ўжо больш за тыдзень. У Тэгеране пануе трывожная атмасфера, піша The New York Times.

У краіне нарастае напружанне праз загадкавую адсутнасць Вярхоўнага лідара Ірана, аяталы Алі Хамэнэі, якога ўжо больш за тыдзень не бачылі на публіцы і не чулі ў афіцыйных зваротах. Гэта выклікала хвалю занепакоенасці сярод грамадскасці, палітычнай эліты і нават дзяржаўных СМІ.

У аўторак вядоўца іранскай дзяржаўнай тэлевізіі публічна звярнуўся да прадстаўніка офіса Хамэнэі з пытаннем, якое непакоіць усю краіну: «Што з нашым лідарам?» Адказ быў туманным - толькі заклік да малітвы і запэўненні ў выкананні захадаў бяспекі.

Адсутнасць Вярхоўнага лідара выклікае асаблівую трывогу на фоне апошніх падзей: масаваных авіяўдараў ЗША па іранскіх ядзерных аб'ектах, удару ў адказ па амерыканскай базе ў Катары і тэрміновага пагаднення аб спыненні агню з Ізраілем, укладзенага пры пасярэдніцтве Катара і ЗША.

Са слоў інсайдэраў, Хамэнэі нібы хаваецца ў бункеры і пазбягае электроннай сувязі праз пагрозу замаху. У той жа час ніякай афіцыйнай інфармацыі аб ягоным стане або ўдзеле ў прыняцці ключавых пастаноў не паступала.

На фоне нявызначанасці ў палітычных колах Ірана актывізаваліся ўнутраныя фракцыі. Прэзідэнт Масуд Пезешкіян, вядомы сваім умераным курсам, выступіў з заклікам змяніць стыль кіравання краінай і аднавіць дыялог з Захадам. Затое жорсткая кансерватыўная апазіцыя на чале з Саідам Джалілі рэзка раскрытыкавала яго за «нечаканую» згоду на спыненне агню і гатоўнасць вярнуцца да ядзерных перамоў.

Адсутнасць Хамэнэі, які мае вызначальнае слова ў вайсковых і дзяржаўных пытаннях, стварае вакуум улады. Аналітыкі папярэджваюць: калі ён не з'явіцца публічна ў найбліжэйшыя дні, асабліва на рэлігійнай працэсіі Ашура, гэта можа сведчыць пра глыбейшы крызіс, чым зараз прызнае афіцыйны Тэгеран.