Каралева NATO
- Илона Громлюк, «ВВС Украина»
- 26.06.2025, 19:56
Хто тая загадкавая жанчына ў жоўтым, якая ўразіла ўсіх на саміце?
"Лэдзі ў жоўтым", “каралева NATO” - так ужо паспелі празваць у сацсетках яркую жанчыну, якая ў касцюме канарэечнага адцення эфектна вылучаецца сярод лідараў краін-членаў абароннага альянсу ў Гаазе.
Гэта Максіма, каралева Нідэрландаў. І сёлета, калі ўдзельнікі NATO прыехалі на саміт у Гаазе, яна гаспадыня гэтага мерапрыемства.
Разам з мужам, каралём Вілемам-Аляксандрам, яна вітае гасцей, якія прыбылі на мерапрыемства.
Сярод іх і Дональд Трамп. Яшчэ некалькі гадзін таму прэзідэнт ЗША не стрымліваў лаянкі, апісваючы сарванае перамір'е паміж Ізраілем і Іранам, а падчас знаёмства з каралевай Максімай выглядае натхнёным, усмешлівым, відавочна захопленым яе шармам.
Нідэрландцы зусім не здзіўленыя: іх каралева, якую ў краіне спачатку ўспрынялі холадна, вось ужо 12 гадоў не перастае прыемна іх здзіўляць. Яе любяць за жвавасць, сапраўднасць, уменне змякчаць вуглы.
І ў тым ліку за яе модныя строі.
Максіма: з Нью-Ёрка - на трон
Маці траіх дзяцей, вядомая сваім пачуццём стылю, былая інвестыцыйная банкірка з Нью-Йорка.
Паспяховая банкірка аргенцінскага паходжання пазнаёмілася са сваім будучым мужам, тады наследным прынцам Вілемам-Аляксандрам, на вечарынцы ў Гішпаніі ў 1999 годзе.
Яны хутка закахаліся, але калі прэса пра гэта даведалася - усчаўся скандал.
Бацька Максімы, Хорхе Сарэгета, быў міністрам сельскай гаспадаркі пры ваеннай дыктатуры Аргентыны падчас сумна вядомай «бруднай вайны».
І хаця Максіма ў той час была дзіцем, гэтая сувязь выклікала шмат спрэчак у Нідэрландах.
Некаторы час нават ішла кампанія за арышт Сарэгеты і яго судовы пераслед за злачынствы супраць чалавечнасці, калі ён прыедзе ў Нідэрланды.
Але спэчкі спыніла былая каралева Беатрыкс, маці прынца.
Каралева дабраславіла шлюб старэйшага сына, апісаўшы Максіму як «разумную і сучасную жанчыну».
Але бацькі Максімы на вяселлі ўсё ж не было, яму не дазволілі прыехаць да дачкі.
Не ўваходзіў ён і ў спіс гасцей інаўгурацыі, якую правялі ў 2013 годзе.
Але затым парламент дазволіў Сарэгеце і яго жонцы наведаць хрэсьбіны іх трох унучак.
«Мы любім яе, у ёй ёсць запал»
Простыя нідэрландцы палюбілі Максіму адразу пасля вяселля.
Яны былі ўражаны, што як толькі Максіма пераехала, то пачала вывучаць галандскую і дасягнула ў гэтым поспехаў.
«Яна прыйшла і атрымала перамогу», - кажа галандскі гісторык Хэнк тэ Вельдэ пра яе удзел ў грамадскім жыцці Нідэрландаў.
Са слоў Хана ван Бры, гісторыка, які спецыялізуецца на галандскай каралеўскай сям'і, лацінаамерыканскія карані Максімы дадаюць ёй прывабнасці.
«Яна экзатычная, у яе ёсць запал, бляск і яркасць, і яна не спрабуе быць аддаленай, як Беатрыкс», – сказаў ён карэспандэнту BBC Ганне Холіган у 2013 годзе.
«Мы любім яе за гэта, людзі могуць адчуць яе сапраўднасць»
Акрамя ўдзелу ў розных справах унутры Нідэрландаў, Максіма таксама з'яўляецца спецыяльнай адвакататкай генеральнага сакратара ААН ў пытаннях інклюзіўнага фінансавання развіцця.
Яна таксама ўдзельнічае ва ўнутраных дэбатах ў спрэчных тэмах іміграцыі і інтэграцыі, што ў мінулым прыводзіла да яе канфліктаў з уплывовым правым крылом краіны.
Максіма таксама вядома сваёй падтрымкай ЛГБТ-супольнасці. Адно з яе першых выступаў у якасці каралевы адбылося на двухдзённым міжнародным саміце па правах геяў у Гаазе.
Аглядальнікі адзначаюць, што Максіма спрыяльна паўплывала на паводзіны мужа на публіцы.
З дзяцінства Вілем-Аляксандр меў складаныя адносіны з прэсай.
«Ён не казаў СМІ «ісці да д'ябла», як паведамлялася, калі яму было 11 гадоў, але гэта было нешта падобнае да гэтага», - распавядаў Ван Бры.
Ён заўсёды быў сарамлівым на публіцы, скаваным, кажуць аглядальнікі, але з Максімай ён выглядае больш расслабленым.
Сёння галандцы любяць сваю каралеву, а аглядальнікі часам называюць яе «самай цікавай каралеўскай асобай».
Каралева моды
Апроч яе дасягненняў дома і ў сямейным жыцці, публіка з першага дня абмяркоўвае яе ўборы.
Каралева Максіма вядомая ў Нідэрландах і за яе межамі праз яркі стыль і ўменне спалучаць элегантныя сукенкі і смелыя аднатонныя колеры.
У прэсе можна знайсці нават гайд пра тое, «як апранацца, як каралева Максіма».
Гэтая жанчына ведае, як выкарыстоўваць сілу першага ўражання.
Яе экстравагантная вясельная сукенка колеру слановай косці з шоўку мікада была ад Valentino.
А яе пазнейшыя ўборы на розных важных падзеях не раз звярталі ўвагу прэсы, зноў і зноў трапляючы ў загалоўкі.
Заўважылі яе і ва ўкраінскім уборы падчас візіту на Кубу ў 2023 годзе, дзе Максіма была апранута ў вышываную сукенку ад украінскага брэнда Foberini.
На саміце NATO, дзе Максіма вылучалася сваім жоўтым касцюмам канарэечнага адцення, звычайна апранаюцца ў больш стрыманыя колеры.
Хоць як такога дрэс-кода няма - на здымках з мінулых самітаў можна ўбачыць лідарак краін і ў серабрыстым, і ў асляпляльна-белым, і ў гарнітурах колеру фуксіі.
Са з'яўленнем у палітыцы Уршулі фон дэр Ляйен, якая любіць белыя ці ружовыя пінжакі, на здымках лідараў краін адназначна стала больш колераў.
Ды і мужчыны-палітыкі, як відаць на фота, аддаюць перавагу розным колерам гальштукаў на афіцыйных здымках.
Але гэта, падобна, першы раз, калі каралеўская асоба, прадстаўніца краіны- гаспадыні саміту, так паспяхова змагла звярнуць на сябе ўвагу, прыцягнуўшы да сябе позіруі не толькі сацсетак, але і сусветных лідараў.
Ілона Грамлюк, «ВПС Украіна»