Прэм'ер Латвіі абвергла чуткі аб магчымым зняцці санкцый з рэжыму Лукашэнкі

• 26.06.2025, 14:29

Літва таксама абвяргае чуткі.

Калі ў сацыяльных сетках з'явіліся паведамленні , што Злучаныя Штаты нібыта паабяцалі Беларусі зноў атрымаць доступ да партоў у Літве і Латвіі, прэм'ер-міністр Латвіі Эвіка Сіліня рашуча заявіла, што пастановы ў працы латвійскіх партоў прымае толькі ўрад, паведамляе TVP.

"Магу ясна сказаць: пастановы адносна партоў прымае ўрад Латвіі", — сказала Сіліня ў сераду ў інтэрв'ю СМІ.

Без змен ў санкцыях

Прэм'ер Латвіі запэўніла, што ніякіх змен ў санкцыях, накладзеных на Беларусь, не адбылося. Яна таксама адзначыла, што захаванне санкцый застаецца адным з ключавых прыярытэтаў латвійскага ўрада, у тым ліку абмежаванняў адносна так званага "ценявага флоту" Расеі.

"Мы не можам дазволіць Расеі фінансаваць сваю ваенную машыну, якую падтрымлівае таксама Беларусь", - адзначыла прэм'ер.

Літва таксама абвяргае чуткі

Падобна выказаўся і міністр замежных спраў Літвы Кястуціс Будрыс, які рашуча абверг інфармацыю, што вядуцца якія-небудзь перамовы ў змякчэнні санкцый у дачыненні да Беларусі.