Трамп назваў саміт NATO цудоўным

• 26.06.2025, 18:09

Прэзідэнт ЗША назваў яго «адным з самых згуртаваных і дзейсных у гісторыі».

Прэзідэнт ЗША Дональд Трамп высока ацаніў саміт NATO, які прайшоў напярэдадні, назваўшы яго «адным з самых згуртаваных і дзейсных у гісторыі». Пра гэта ён напісаў у сацыяльнай сетцы Truth Social.

Ён асабліва адзначыў узгодненае абавязальніцтва чальцоў альянсу павялічыць выдаткі на абарону да 5% ВУП, падкрэсліўшы, што гэта «дае NATO рэальную сілу». Паводле словаў Трампа, саміт прайшоў «выдатна» і стаў «цудоўным днём з неверагоднымі і адказнымі лідарамі».

Раней, 25 чэрвеня, паводле вынікаў саміту ў Гаазе краіны NATO дамовіліся павялічыць выдаткі на абарону да 5% ВУП да 2035 года. Паводле выніковага камюніке, такая пастанова была прынятая ў сувязі з «фундаментальнымі пагрозамі бяспецы, сярод іншага доўгатэрміновай пагрозы з боку Расеі», а таксама пагрозы тэрарызму.