У Сербіі ўспыхнулі маштабныя пратэсты: адбыліся сутыкненні

• 29.06.2025, 8:13

Дэманстранты выйшлі на мітынг у Бялградзе з патрабаваннем правядзення датэрміновых выбараў.

У сербскім Бялградзе ўвечары, 28 чэрвеня, стартавалі маштабныя акцыі пратэсту з удзелам студэнтаў і апазіцыі.

Аб гэтым паведамляе выданне Blic.

Дэманстранты выйшлі на мітынг з патрабаваннем датэрміновых выбараў. Акцыя пратэсту перарасла ў сутыкненні з паліцыяй. Ужытыя слезацечны газ і светлашумавыя гранаты.

Паліцыя заблакавала падыходы па вуліцы Князя Мілаша да Піянерскага парка, а таксама па вуліцы Караля Мілана да Прэзідэнцкай адміністрацыі.

Сілавікі падзялілі дэманстрантаў на тры групы і пачалі іх адціскаць. На бульвары Краля Аляксандра затрымалі мінімум двух мужчын.

Пратэстоўцы кідалі ў сілавікоў піратэхніку і іншыя прадметы, а таксама спрабавалі прарваць ачапленне паліцыянтаў. Пачаліся затрыманні.

Маштабная акцыя пратэсту стала працягам мітынгаў супраць карупцыі, якія працягваюцца з канца мінулага года. Яны ўспыхнулі праз падзенне даху на чыгуначным вакзале ў Нові-Садзе, у выніку чаго загінулі 16 чалавек.