УСУ знішчылі два расейскія самалёты Су-34 на аэрадроме Марынаўка

• 29.06.2025, 18:29

Апублікаваныя спадарожнікавыя здымкі.

Здымкі спадарожніка пацвярджаюць паспяховую атаку Сіл абароны Украіны на расейскі аэрадром Марынаўка і паражэнне самалётаў Су-34. Пра гэта паведамілі OSINT-аналітыкі "КіберБорошно" у нядзелю, 29 чэрвеня.

"На здымках спадарожніка ад 29 чэрвеня зафіксаваныя вынікі паспяховага нападу на расейскі аэрадром", — гаворыцца ў паведамленні.

Паводле здымкаў, два самалёты Су-34 цалкам знішчаныя, яшчэ два атрымалі пашкоджанні.

Аналітыкі адзначылі, што на адным з месцаў стаянкі самалётаў можна ўбачыць сляды магчымай дэтанацыі падвеснага ўзбраення. На здымку гэты момант выдзелены жоўтым колерам.

"КіберБорошно" таксама піша, што, паводле здымкаў Sentinel-1 ад 25 чэрвеня, менавіта ў гэтым месцы раней базавалася група самалётаў.

27 чэрвеня Служба бяспекі Украіны паведаміла празнішчэнне двух і пашкоджанні яшчэ двух расейскіх Су-34 на аэрадроме Марынаўка ў Валгаградскай вобласці РФ. Аперацыя праведзена з дапамогай дальнабойных дронаў.