Што можна атрымаць за чэкі з «Пагоняй»

• 3.06.2025, 22:24

Беларусы яшчэ могуць атрымаць карысць з чэкаў «Маёмасць».

Напэўна, многія памятаюць старыя, пацёртыя сертыфікаты з выявай Мірскага замка і дзяржаўнай сімволікі 1991–1994 гадоў. Гэта маёмасныя прыватызацыйныя чэкі «Маёмасць», якія былі ўведзеныя ў абарачэнне ў Беларусі ў 1993 г. у рамках «народнай» ваўчарнай прыватызацыі і выдаваліся да сярэдзіны 1997 года.

Масавая прыватызацыя ў краіне так і не адбылася, але менавіта дзякуючы чэкам «Маёмасць» многія фізічныя асобы сталі акцыянерамі прадпрыемстваў, на якіх яны працавалі.

Як вынікае з пастановы, апублікаванай на нацыянальным прававым партале, у Беларусі зноў працягнулі тэрмін абарачэння імянных прыватызацыйных чэкаў «Маёмасць». Іх можна будзе выкарыстоўваць яшчэ 5 год.

Тэрмін дзеяння гэтых чэкаў заканчваўся 31 снежня 2025 года. Цяпер жа беларусы змогуць скарыстацца імі да канца 2030 года, гаворыцца ў дакуменце.

Іх можна выкарыстоўваць для куплі акцый беларускіх прадпрыемстваў. Абмен чэкаў на акцыі праводзіцца ў аддзяленнях Беларусбанка.

На сёння для абмену на чэкі «Маёмасць» прапануюцца акцыі 158 адкрытых акцыянерных таварыстваў у розных галінах.

Тэрмін дзеяння гэтых папер карэктаваўся ў Беларусі некалькі разоў. У 2022-м яго працягнулі на тры гады - да канца 2025-га.