Лукашэнку ўказалі на яго месца
- 30.06.2025, 22:39
Дастаткова было двух слоў.
Сярэднетэрміновыя наступствы візіту Кіта Келага ў Менск пакуль адносяцца да катэгорыі «пажывём-пабачым». Пакуль жа можна канстатаваць, што на кароткай дыстанцыі Аляксандр Лукашэнка наўрад ці атрымаў жаданае, піша «Салiдарнасць».
Увесь тыдзень прапаганда апантана спрабавала стварыць «карцінку» пад назвай «адзін з апошніх сапраўдных сусветных лідараў даў шасцігадзінны майстар-клас дыпламатыі спецпасланніку прэзідэнта ЗША». Вось толькі амерыканцы зусім ёй у гэтым не памагалі.
У выніку менскім ідэолагам давялося займацца адкрытымі маніпуляцыямі. Паказальны невялікі адрэзак з перамоў, які можна было назіраць на свае вочы. Перакладчык, даносячы да Лукашэнкі сказанае Келагам, перыядычна кажа: «Спадар прэзідэнт…». Аднак прамова генерала таксама чуваць, і гэтых слоў у ёй няма.
Пры гэтым беларускі дыктатар увесь час звяртаецца да спецпасланніка – «пан генерал». А ў пачатку сустрэчы лісліва называе Келага «самай медыйнай асобай у апошні час».
Гэта значыць, госць з-за акіяна, які нібыта прыехаў атрымаць «парады гуру сусветнай дыпламатыі», нават не расшчадрыўся ў якасці фармальнай ветлівасці на два словы, якія так прагнуў пачуць Лукашэнка. Таму ў «дубляжы» ад сталага прадстаўніка Беларусі пры ААН Валянціна Рыбакова зварот «пан прэзідэнт» гучыць, а ў арыгінале - не.
Гэтая дэталь дэманструе, што адміністрацыя Дональда Трампа, якога Аляксандр Лукашэнка так нахвальваў, не ўважае апошняга за законнага прэзідэнта Беларусі. Сам факт сустрэчы, вядома, таксама мае значэнне. Вось толькі размаўляць амерыканцам даводзіцца і з персонамі яшчэ горшымі за Лукашэнку. Так ужо ўладкаваны свет.
Зразумела, Лукашэнка не дачакаўся «дзякуй» за свае «каштоўныя меркаванні» і ад Трампа. Больш за тое, прэзідэнт ЗША наступіў «гуру» на хворы мазоль, фактычна працытаваўшы Святлану Ціханоўскую. Гаспадар Белага Дома размясціў у Truth матэрыял, у якім яна дзякуе за вызваленне мужа, і пракаментаваў: «Thank you President Trump!»
Лукашэнка мог спадзявацца, што нешта са знакам плюс пра яго скажуць праз паўзу: ну хоць за тое, што прадуктаў на дарогу даў. Але мінуў тыдзень, а Вашынгтон захоўвае маўчанне.
Гэта маленькія, але важныя нюансы, якія раскрываюць стаўленне ўладаў ЗША да Лукашэнкі. Далей магчымыя розныя сцэнары, але зараз яго ў якасці паўнапраўнага кіраўніка дзяржавы не ўспрымаюць.