Танкер з мільёнам барэляў нафты выбухнуў ля берагоў Лібіі

• 30.06.2025, 21:29

Перад гэтым судна двойчы заходзіла ў расейскія парты.

Нафтавы танкер Vilamoura, які перавозіў 1 мільён барэляў нафты, выбухнуў ля берагоў Лібіі. Судна двойчы заходзіла ў расейскія парты, паведамляе Bloomberg.

Танкер Vilamoura буксіруюць у Грэцыю, дзе спецыялісты ацэняць нанесеныя пашкоджанні. Са слоў прадстаўніка кампаніі TMS Tankers, выбух прывёў да затаплення машыннага аддзялення, і ў корпус паступае вада. Дакладная прычына здарэння пакуль невядомая.

Гісторыя судна і сувязі з расейскімі партамі

Vilamoura зайшла ў расейскі порт Усць-Луга ў пачатку красавіка, дзе загрузіла нафту казахскага паходжання.У траўні танкер таксама зайшоў на тэрмінал Каспійскага трубаправоднага кансорцыума каля расейскага порта Новарасійск, які загружае ў асноўным казахскую нафту.

Экіпаж у бяспецы, забруджвання няма

Паводле інфармацыі кампаніі-мэнэджара, забруджвання навакольнага асяроддзя ў выніку інцыдэнту не адбылося. Усе члены экіпажа знаходзяцца ў бяспецы.

Vilamoura пасля здарэння змяніла курс і накіроўваецца ў Грэцыю. Судна чакаюць у адным з партоў, дзе правядуць тэхнічную дыягностыку і ацэняць маштаб пашкоджанняў.

Серыя загадкавых выбухаў

Паводле звестак кансалтынгавай кампаніі Vanguard Tech, з пачатку года аналагічныя выбухі адбыліся яшчэ на чатырох суднах. Усе яны раней заходзілі ў расейскія парты.

Пасля такіх інцыдэнтаў ўладальнікі пачалі выкарыстоўваць вадалазаў і падводныя дроны для праверкі суднаў на наяўнасць мін і іншых пагроз.