WP: Украіна пасылае тры сігналы ЗША і Еўропе
- 4.06.2025, 21:47
Украінцы заявілі: "Мы жорсткія, смелыя — і маем рацыю”.
Чарговы безвыніковы раўнд мірных перамоў паміж Расеяй і Украінай у панядзелак, 2 чэрвеня, у значнай ступені “зацямнілі” падзеі на месцах: зруйнавальныя ракетныя і БПЛА-атакі РФ на ўкраінскія населеныя пункты і ўдар па вайсковым палігоне, атака ўкраінскіх беспілотнікаў на авіябазы ў Расеі, а таксама падрыў апор Крымскага моста.
Расейскія ўдары не былі нечаканасцю і вызначыліся звычайнай жорсткасцю Крамля супраць цывільных украінцаў. Аперацыі Украіны, наадварот, былі дыпламатычна ўзважанымі, і нечаканымі, і ўтрымлівалі тры пасланні, якія маюць глыбокае значэнне для вайны, піша рэдакцыйная калегія WP.
Дзеянні Кіева былі дзёрзкімі сваёй маштабнасцю, распасціраючыся ад Палярнага круга на паўночным захадзе да Сібіры на Далёкім Усходзе Расеі. Украіна і раней наносіла ўдары па цэлях у глыбіні РФ, але ніколі ў такім маштабе і з такой складанасцю, дэманструючы здольнасць набліжацца ўшчыльную да расейскіх вайсковых аб'ектаў, якія павінны быць сярод найбольш абароненых.
Нядаўнімі ўзмоцненымі ўдарамі па ўкраінскіх гарадах, якія выклікалі незвычайную крытыку з боку прэзідэнта ЗША Дональда Трампа, расейскі дыктатар Уладзімір Пуцін, падобна, даў зразумець, што, на ягоную думку, у РФ ёсць перавага ў вайне і ён выкарыстоўвае гэта ў той час, калі Украіна, здавалася б, вось-вось страціць падтрымку з боку Вашынгтона. Стварэнне ўражання бескарыснасці падтрымкі Кіева можа падштурхнуць Трампа да выхаду з перамоў або да спробы навязаць Украіне нявыгаднае мірнае пагадненне.
Па-першае, атакай беспілотнікаў супраць расейскай авіяцыі Украіна прадэманстравала Трампу, што можа выкарыстоўваць свой розум і настойлівасць, каб працягваць барацьбу: яна пераможа.
Па-другое, Кіеў таксама даў зразумець Трампу і сваім еўрапейскім хаўруснікам, што, хоць РФ і пераважае паводле колькасці і ўзбраення, Украіна ўсё яшчэ здольная нанесці значную шкоду расейскім вайскоўцам і яе нельга ігнараваць у перамовах. Кіеў можа супраціўляцца дрэннаму пагадненню, калі Трамп паспрабуе такое навязаць - нават калі ЗША выйдуць з перамоў, асабліва калі еўрапейскія краіны працягнуць падтрымку Украіны.
Жадаючы таго ці не, Украіна адправіла і трэці сігнал - падкрэсліўшы кантраст паміж сваімі паводзінамі ў вайне і дзеяннямі Расеі. Нядаўнія ўдары РФ былі накіраваныя пераважна на цывільныя аб'екты. Тады як украінскія аперацыі, хоць і дасягалі далёка ўглыб расейскай тэрыторыі, былі нацэленыя на вайсковыя аб'екты. Украінскія чыноўнікі сцвярджаюць, што выбух на Крымскім мосце не прывёў да ахвяр сярод цывільнага насельніцтва. Гэтая вайна пачалася, калі Крэмль уварваўся на тэрыторыю суверэннай суседняй дзяржавы без усялякага апраўдання: з яе працягам маральныя адрозненні паміж двума бакамі сталі толькі больш відавочнымі.
Украінцы заявілі: "Мы жорсткія, рашучыя - і маем рацыю. Гэта барацьба, якую Злучаныя Штаты павінны з гонарам падтрымліваць”. Застаецца высветліць, ці дастаткова гэтага, каб пераканаць Трампа стаць больш жорсткім да Пуціна, рэзюмуе выданне.