ЕЗ падаўжае часовую абарону для ўкраінскіх уцекачоў

• 4.06.2025, 17:56

Еўрапейскія краіны маюць намер шукаць доўгатэрміновае развязанне.

Еўрапейская камісія абвясціла аб падаўжэнні часовай абароны для ўкраінскіх уцекачоў яшчэ на год - да сакавіка 2027 года. Разам з тым у Брусэлі прадставілі доўгатэрміновую стратэгію, накіраваную на пераход уцекачоў да сталых прававых статусаў або на іх паступовае вяртанне ва Украіну, піша Politico (пераклад - сайт Charter97.org).

«Больш за ўсё Украіне патрэбныя яе людзі, і мы павінны дапамагчы ўкраінцам прымаць усвядомленыя пастановы аб сваёй будучыні — вярнуцца дадому або пакуль працягваць падтрымліваць Украіну з Еўропы», — заявіў камісар ЕЗ у міграцыі Магнус Брунэр.

Для каардынацыі гэтага працэсу ў ЕЗ прызначаць спецыяльнага ўпаўнаважанага ў пытаннях украінскіх уцекачоў. Таксама плануецца стварэнне "Unity Hubs" - інфармацыйных цэнтраў, якія супольна з Украінай будуць дапамагаць уцекачам з інтэграцыяй і прадастаўляць інфармацыю аб магчымасцях вяртання.

З моманту поўнамаштабнага ўварвання Расеі ва Украіну ў 2022 годзе ў ЕЗ знайшлі прытулак больш за 4,3 мільёна ўкраінцаў. Часовы статус абароны, які дае права пражывання ў краінах ЕЗ, некалькі разоў падаўжаўся, апошні раз — да сакавіка 2026 года.

Міністр нацыянальнага адзінства Украіны Аляксей Чарнышоў падкрэсліў, што часовая абарона павінна захоўвацца «да дасягнення трывалага міру», але таксама адзначыў, што пасля заканчэння вайны ўкраінцы вельмі неабходныя сваёй краіне. Паводле яго слоў, частка ўцекачоў застанецца ў Еўропе, і Украіна зацікаўлена ў паспяховай інтэграцыі гэтых людзей.