Беларусы прымусілі А1 і МТС пайсці на саступкі

• 7.06.2025, 18:46

Папулярныя тарыфы застаюцца.

У пачатку чэрвеня мабільныя аператары МТС і А1 збіраліся закрыць архіўныя тарыфныя планы з безлімітным інтэрнэтам і прымусова перавесці абанентаў на падобныя, але даражэйшыя, піша «Зеркало».

Карыстальнікі TikTok актыўна абмяркоўвалі гэты крок. Пасля «з улікам шматлікіх скарг грамадзян» умяшалася Міністэрства антыманапольнага рэгулявання і гандлю (МАРГ).

5 чэрвеня ў міністэрстве прайшла працоўная сустрэча з прадстаўнікамі аператараў і міністэрства сувязі.

«МАРГ указаў мабільным аператарам на недапушчальнасць падвышэння тарыфаў для спажыўцоў з прычыны павелічэння аб'ёму спажывання інтэрнэт-трафіку і неабходнасці падтрымання якасці паслуг», — гаворыцца ў паведамленні ведамства.

Пасля сустрэчы мабільныя аператары вярнулі абанентаў на ранейшыя безлімітныя тарыфныя планы.

Аператары сувязі таксама абвясцілі аб гэтым на сваіх сайтах. У МТС расказалі, што пераносяць дату закрыцця архіўных тарыфных планаў лінейкі «Безліміцішча». Абаненты могуць працягваць імі карыстацца, а тыя, хто перайшоў пасля рассылкі - могуць вярнуцца. А1 зрабіў такую ж аб'яву аб тарыфах «Без ліміту». Абодва аператары пакінулі гэтыя тарыфы архіўнымі - гэта значыць, новыя абаненты не могуць да іх падключацца, але старыя працягваюць карыстацца на ранейшых умовах.