У Энгельсе трэці дзень магутна гарыць нафтабаза пасля ўкраінскага нападу

• 8.06.2025, 15:12

Чорны дым з месца трапляння дронаў відаць з розных куткоў горада.

У расейскім Энгельсе Саратаўскай вобласці трэці дзень запар гарыць нафтабаза. Яе ў ноч на 6 чэрвеня атакавалі ўкраінскія абаронцы.

Пра гэта паведамляе Telegram-канал Astra.

Як адзначаецца, агонь працягвае лютаваць на нафтабазе «Крышталь» у Энгельсе, дзе знаходзіцца база стратэгічнай авіяцыі РФ. Чорны дым з месца трапляння відаць з розных куткоў горада.

Пры гэтым расейскія чыноўнікі спрабуюць супакоіць жыхароў Энгельса, што нібыта праз пажар паветра не забруджанае.

«Спецыялісты Расспажыўнагляду ў бесперапынным рэжыме працягваюць маніторынг стану паветра. Аналіз адабраных сёння пробаў не выявіў перавышэння канцэнтрацыі шкодных рэчываў у межах жылой забудовы на тэрыторыі Энгельса. Адбор пробаў будзе праводзіцца да поўнай ліквідацыі ўзгарання», - паведамілі ва ўрадзе Саратаўскай вобласці.