Генштаб УСУ: Расейцы спрабавалі прарвацца ў Пакроўскім кірунку

• 8.06.2025, 18:23

Украінскія абаронцы далі ім магутны адпор.

Украінскія сілы абароны стрымліваюць шырокамаштабныя атакі з боку расейскіх войскаў ў шэрагу напрамкаў фронту, паведаміў Генеральны штаб Узброеных сіл Украіны ў зводцы ў стане а 16:00 8 чэрвеня. Усяго з пачатку содняў адбылося сама меней 75 баявых сутыкненняў.

Самыя моцныя баі працягваюцца ў Пакроўскім напрамку, дзе праціўнік здзейсніў 25 спроб штурмаваць украінскія пазіцыі паблізу населеных пунктаў Міралюбаўка, Малінаўка, Лізаветаўка, Лісоўка, Зверава, Удалае, Арэхавае, а таксама ў напрамку Новага Міра, Мікалаеўкі, Новасяргееўкі і Аляксееўкі. Сілы абароны адбілі 24 атакі, адна сутычка яшчэ працягваецца.

У Ліманскім напрамку ўкраінскія падраздзяленні адбілі дзевяць атак каля Грэкаўкі, Новага Свету, Рэдкадуба, Зялёнай Даліны і ў напрамку Чарнешчыны і Торскага. Тры сутыкненні застаюцца актыўнымі.

У раёне Тарэцка вораг восем разоў спрабаваў прарваць абарону паблізу Дачнага, Дыліеўкі, Тарэцка і Ябланаўкі. Адзін бой да гэтага часу працягваецца.

На Купянскім напрамку ідзе чацвёрты бой паблізу Стэпавай Навасёлаўкі — тры папярэднія штурмы ўкраінскія вайскоўцы адбілі.

Складаная сітуацыя і ў Навапаўлаўскім напрамку: ВСУ адбілі сем атак каля Багатыра, Уцешнага, Роўнаполя, Свабоднага Поля, а таксама ў напрамках Запарожжа, Васкрэсенкі і Шаўчэнкі. Адно баявое сутыкненне яшчэ працягваецца. Пад варожы авіяўдар трапіў населены пункт Вольгаўскае.

На Гуляйпольскім напрамку ўкраінскія сілы адбілі дзве атакі паблізу Малінаўкі, яшчэ адно сутыкненне працягваецца. Акупанты таксама нанеслі авіяўдары па Гуляйполі, Малінаўцы і Жалезнадарожнаму.

Арэхаўскі напрамак таксама застаецца гарачым — дзве варожыя атакі на пазіцыі ў Новаандрэеўкі і Паўлаўкі былі спыненыя.

У Прыдняпроўскім кірунку супернік двойчы спрабаваў прарвацца наперад, аднак беспаспяхова.

У Курскім напрамку ўкраінскія абаронцы адбілі 11 атак. Вораг здзейсніў 15 авіяўдараў, скінуў 28 кіраваных авіябомбаў і правёў 106 артылерыйскіх абстрэлаў.

Таксама пад агнём застаюцца прымежныя раёны поўначы Украіны. Расейскія войскі абстралялі з уласнай тэрыторыі не менш за 15 населеных пунктаў Чарнігаўскай і Сумскай абласцей, у прыватнасці Горск, Кучароўку, Вялікую Пісараўку, Петрушэўку, Угроіды, Бабылёўку і іншыя.

На іншых участках фронта сітуацыя застаецца без істотных змен.