Што не так з коштамі камуналкі ў Беларусі
- 9.06.2025, 8:43
Улады паспяшаліся пахваліцца.
Беларускія ўлады знайшлі сабе новую нагоду для гонару. І ганарацца ёй даволі гучна. Паводле звестак партала numbeo, Беларусь увайшла ў трыццатку краін з самымі нізкімі камунальнымі плацяжамі. Шкада, праўда, што ў рэйтынгу заробкаў Беларусь ні да якіх прызавых месцаў не дацягвае. Ды і з астатнімі рэйтынгамі, у прынцыпе, не склалася, піша planbmedia.io.
Методыка складання рэйтынгу выклікае, вядома, некаторыя пытанні. У рэйтынгу разлічаны кошт асноўных камунальных плацяжоў для ўмоўнай кватэры плошчай на 85 квадратных метраў. Не сказаць, каб кватэры плошчай 85 квадратных метраў мелі ў Беларусі шырокае распаўсюджанне. Але сутнасць не ў гэтым. Калі рэйтынг дастаткова добры для беларускіх уладаў, каб ім ганарыцца, то і ўсім астатнім ён таксама пасуе.
Паводле ацэнкі numbeo, утрыманне ўмоўнай кватэры ў Беларусі каштавацьме 53 даляры на месяц. І гэта сапраўды значна ніжэй, чым у заходніх суседзяў. У Латвіі камунальныя плацяжы за такую кватэру складуць 300 даляраў, у Польшчы – 293, а ў Літве — 232.
І можна было б сапраўды ганарыцца. Калі гэтую камуналку ні з чым больш не параўноўваць. Напрыклад, з коштам энэрганосьбітаў. Тое, як беларускія ўлады маніпулююць з тарыфамі ЖКГ мы падрабязна разбіралі ў студзені гэтага года. Субсідуючы камунальныя плацяжы насельніцтву, урад прадае газ усім астатнім з надбаўкай больш чым на 60 адсоткаў.
Але яшчэ менш падстаў для гонару атрымліваецца, калі параўнаць колькі каштуе камуналка ў Беларусі з заробкамі. Таму што нават з улікам рэкорднага ўмацавання беларускага рубля сярэдні заробак у Беларусі складае 870 даляраў. Гэта значыць пасля выплаты камуналкі на руках у ўмоўна-сярэдняга беларуса застаецца 820 даляраў.
Пры гэтым сярэдні заробак у Латвіі быў 1700 еўраў, у Літве – 1920. У Польшчы сярэдні заробак у красавіку вырас да больш за 9000 злотых, што складае 2400 даляраў бягучым курсе. То бок, ва ўмоўнага паляка пасля выплаты камуналкі на руках застанецца 2100 даляраў.
Яшчэ крыўдней атрымаецца, калі параўнаць дабрабыт сярэдняга беларуса з дабрабытам паляка, які атрымлівае мінімальны заробак. Таму што мінімальны заробак у Польшчы – 1 200 даляраў. Так што пасля аплаты камуналкі ў беларуса, які жыве на мінімалку, застанецца больш грошай, чым у беларуса, які атрымлівае сярэдні заробак.
Паказальна, што дзяржаўныя медыя параўноўваюць камуналку ў Беларусі з краінамі суседзямі. А з суседзямі ў рэйтынгу - не параўноўваюць. І зразумела чаму. Таму што сярод гэтых суседзяў такія квітнеючыя краіны як Зімбабвэ, Таджыкістан і Гана. Напрыклад Нігерыя, з сярэднім заробкам на 40 даляраў, знаходзіцца на 16 пазіцыяй вышэй, чым Беларусь. А Брацкая Венесуэла, з сярэднім заробкам менш за 30 даляраў, займае ў рэйтынгу даступнасці камунальных плацяжоў наогул прызавое другое месца.
Дарэчы, той жа самы партал numbeo у рэйтынгу якасці жыцця змясціў Мннск на 193 месца сярод 276 гарадоў. Львоў у Украіне знаходзіцца на 196-м.
Увогуле, прасочваецца цікавая заканамернасць. Чым ніжэйшыя ў краіне даходы, тым менш даводзіцца плаціць за камуналку. Праўда, аб даступнасці камуналкі гэта мала што кажа.