Дроны атакавалі ў Іжэўску стратэгічны завод «Купал»

• 1.07.2025, 10:35

Там расейцы вырабляюць ЗРК «Тор» і РЛС.

У Расеі заявілі аб нібыта нападзе беспілотнікаў на горад Іжэўск. Выбухі чулі каля электрамеханічнага завода «Купал», дзе расейцы вырабляюць ЗРК «Тор» і РЛС.

Пра гэта паведамляе РБК-Украіна са спасылкай на расейскі рэсурс Astra і кіраўніка ўкраінскага Цэнтра супрацьдзеяння дэзінфармацыі РНБА Андрэя Каваленкі.

Так, сёння ў горадзе Іжэўск, прагучалі некалькі гучных выбухаў. Пасля гэтага мясцовыя паведамілі аб моцным пажары. У сетцы з'явіліся кадры з нібыта прылётам аднаго з дронаў.

Расейскія крыніцы сцвярджаюць, што пад напад падпала адно з прадпрыемстваў, размешчанае ў горадзе. Між іншым, відавочцы паказваюць на раён, дзе размешчаны Іжэўскі электрамеханічны завод «Купал» – прадпрыемства, якое вырабляе зенітныя ракетныя комплексы «Тор» і радары для войска РФ.

Таксама з'явілася інфармацыя, што Расавіяцыя часова абмежавала прыём і адпраўку рэйсаў у аэрапорце Іжэўска.

Факт выбухаў пацвердзіў і кіраўнік Цэнтра супрацьдзеяння дэзінфармацыі пры РНБА Андрэй Каваленка.

«У расейскім Іжэўску - выбухі. Там ёсць, напрыклад, Іжэўскі электрамеханічны завод «Купал» - гэта адзін з галоўных вытворцаў ЗРК «Тор» і ўдарных БПЛА «Гарпія-А1» для войска РФ», - напісаў ён.

Афіцыйныя расейскія ўлады інцыдэнт пакуль не каментуюць. Губернатар Удмуртыі толькі заявіў, што «ўсе аператыўныя службы працуюць на месцы» і паабяцаў падаць дадатковую інфармацыю пазней.